मुना हमाल
सुर्खेत, असार १७ गते । बजेटमाथि असन्तुष्टी जनाउँदै प्रमुख प्रतिपक्ष दल नेकपा (एमाले) ले प्रदेश सभा बैठकमा अवरोध हटेको छ । आइतबार बसेको सर्वदलीय बैठकमा सहमति जुटाएको हो ।
एमालेले बजेटमाथि असन्तुष्टि जनाउँदै गएको बुधबार प्रदेश सभाको बैठक अवरुद्ध गरेपछि बिहीबार दिउँसो १ बजेसम्मका लागि स्थगित भएको थियो । बिहीबार बैठक नै नबसी आइतबारसम्मका लागि प्रदेश सभाको बैठक स्थगित भएको थियो । आइतबार बसेको सर्वदलीय बैठकमा सहमति भएपछि प्रदेश सभाको बैठक बसेको हो ।
आइतबार सभामुख नन्दा गुरुङ्ग, मुख्यमन्त्री राजकुमार शर्मा, एमाले संसदीय दलका नेता यामलाल कंडेल, नेपाली काँग्रेस संसदीय दलका नेता जीवनबहादुर शाही, स्वतन्त्र प्रदेशसभा सदस्य देवेन्द्रबहादुर शाहीलगायतको उपस्थितिमा बसेको सर्वदलीय बैठकले सातबुँदे निर्णय गरेको छ ।
एमालेले बजेटका विषयमा ध्यानाकर्षण गराएका विषयमा सरकारले कार्यान्वयन गर्ने प्रतिबद्धता जनाएको छ । सरकार र प्रमुख प्रतिपक्षदलबीच भएको सहमतिमा १५ लाखभन्दा कम रकम विनियोजन भएका योजनाहरु कार्यान्वयन नगर्ने, १५ लाखभन्दा माथिका योजनाहरु विनियोजन गर्दा प्रदेश सभा सदस्यहरु र स्थानीय तहले मागेका योजनामा रकम विनियोजन गर्न प्राथमिकता दिने र १५ लाखभन्दा कम रकमका योजनामा विनियोजन भएको रकमको हकमा प्रतिपक्ष दलसँग समन्वय गरी रकम विनियोजन गर्ने व्यवस्था मिलाउने उल्लेख छ ।
यस्तै, सशर्त नाममा सङ्घीय सरकारबाट साना योजनामा रकम विनियोजन भएकोमा निश्चित मापदण्डको आधारमा मात्र सशर्त योजनामा रकम विनियोजन गर्न सङ्घीय सरकारलाई प्रदेश सरकारमार्फत अनुरोध गर्ने निर्णय गरिएको छ ।
कार्य सम्पन्न भएको र दोहोरो रकम विनियोजन भएका योजनामा विनियोजित रकम अध्ययनपछि मात्र कार्यान्वयन गरिने व्यवस्था मिलाउने र सडक भवन निर्माणका योजनाको हकमा ३० लाख रुपियाँ विनियोजन भए उक्त आयोजना कार्यान्वयन नगर्ने व्यवस्था मिलाउने सहमति भएको छ । सहमतिअनुसार कार्यान्वयनका लागि जिल्लामा अख्तियारी पठाउने सर्वदलीय बैठकबाट निर्णय गरिएको छ ।
