कोशी प्रदेशको नाम पुनः विचार गर्नुपर्छ : मन्त्री लिम्बू

काठमाडौं, असार १५ गते । युवा तथा खेलकुमन्त्री एवम् नेपाली कांग्रेसका नेता डिगबहादुर लिम्बूले कोशी प्रदेशको नाम सच्याउनुपर्ने बताउनुभएको छ । शुक्रबार पार्टी केन्द्रीय कार्यालय सानेपामा आयोजित प्रशिक्षण कार्यक्रमलाई सम्बोधन गर्नुहुँदै  उहाँले यस्तो बताउनुभएको हो ।

मन्त्री लिम्बूले नामाकरणपछि कोशी प्रदेशमा समस्या उत्पन्न भइरहेको भन्दै यो समस्यालाई रोक्न आवश्यक रहेको बताउनुभयो । उहाँले प्रदेशको नाम पुनः विचार गर्नुपर्छ भनेर पार्टीको ध्यानाकर्षण गराएको जानकारी दिनुभयो । उहाँले कांग्रेसको गतिविधि शून्य रहेको बेलामा विभिन्न राजनीतिक पार्टीहरू च्याउजस्तै उम्रिएको बताउनुभयो ।

‘‘अहिले कोशी प्रदेशमा समस्या उत्पन्न भएको अवस्था छ । त्यो विषयमा केन्द्रीय सभापति ज्यु र केन्द्रीय नेताहरू अनविज्ञ हुनुहुन्न । त्यो विषय त्यहाँका सांसद साथीहरूले उठाउनुभएको छ । त्यहाँ कांग्रेसमा आबद्ध साथीहरूलाई तपाईँहरू पहिचान विरोधी हो ? तपाईँहरू सङ्घीयता विरोधी हो की होइन, होइन भने प्रदेश १ को नाम राख्ने बेलामा जबरजस्ती रातारात किन कोशी प्रदेश राख्नुभयो भनेर हामीले फोनमा भनेका थियौँ ।’’ मन्त्री लिम्बूले भन्नुभयो, ‘‘यो पुनः विचार गर्नुपर्छ भनेर हामीले पार्टीको ध्यानाकर्षण गराएका छौँ । पार्टी के भन्छ सभापतिज्यूले भन्नुहोला । जनताको भावनाअनुसार जनताका कुरा सम्बोधन हुनेकुरा पार्टीभित्र आवाज उठ्छ की उठ्दैन ? पार्टीभित्र छलफल र बहस गरेर जनताको बीचमा जानुपर्छ ।’’

मन्त्री लिम्बूले पार्टीको रुचिमा नपरेको मन्त्रालय आफूलाई दिइए पनि पर्याप्त बजेट नदिएकोप्रति असन्तुष्टि व्यक्त गर्नुभयो । उहाँले युवा तथा खेलकुद मन्त्रालयमा गाडीमा तेल हालेर हिँड्ने पैसा समेत नभएको दाबी गर्नुभयो । 

उहाँले भन्नुभयो, ‘‘अहिले नेपाली कांग्रेसको गतिविधि शून्य रहेको बेलामा विभिन्न राजनीतिक पार्टीहरू च्याउजस्तै उम्रिएका छन् । हामी चुप लाग्ने हो भने कांग्रेसको इतिहास मेटिने देखिन्छ । पार्टीको केन्द्रमा नपरेको मन्त्रालय मलाई दिइएको छ । त्यो मन्त्रालयभित्र गाडीमा तेल हालेर हिँड्ने पैसा पनि छैन, कस्तो मन्त्रालय होला ? यो मन्त्रालयको रिफर्म नगरी मन्त्रालय अघि बढ्ने स्थिति छैन । यो मन्त्रालयमा दुई अर्ब सात करोड रुपियाँ मात्रै बजेट छ । पैसै छै, तर सिलिङ थपिएन । जति छ त्यसलाई व्यवस्थापन गर्नेछु ।’’

मन्त्री लिम्बूले अहिले कांग्रेसको गतिविधि सुस्त भएको भन्दै जनतासमक्ष पार्टीका गतिविधि लैजान पार्टी सभापति शेरबहादुर देउवासँग आग्रह गर्नुभयो ।