सिकलसेल स्क्रिनिङ अभियान

धनगढी समाचारदाता

धनगढी, असार ५ गते । कैलालीको कैलारी र जानकी गाउँपालिकामा सिकलसेल र थालासेमिया स्क्रिनिङ अभियान सञ्चालन गरिएको छ। थारू समुदायमा देखा परेको सिकलसेल एनिमिया र थालासेमिया रोग पहिचान तथा निदान गर्ने उद्देश्यले सुदूरपश्चिम प्रदेश सरकारको आर्थिक सहयोग र स्थानीय तहको समन्वयमा जिल्ला स्वास्थ्य कार्यालयले सो अभियान सञ्चालन गरेको हो।

सो अभियानको सुदूरपश्चिम प्रदेशका मुख्यमन्त्री कमलबहादुर शाहले उद्घाटन गर्नुभएको हो। कैलारी गाउँपालिकाबाट अभियान सञ्चालन गर्दै मुख्यमन्त्री शाहले सिकलसेल र थालासेमिया रोग निदानका लागि प्रदेश सरकारले निःशुल्क परीक्षणको व्यवस्था गरेको बताउनुभयो। नागरिकले निःशुल्क स्वास्थ्य परीक्षण र उपचार गर्न पाउने व्यवस्था पनि प्रदेश सरकारले गर्ने उहाँको भनाइ थियो। “सिकलसेल जाँच अभियानले पूर्णता नपाउँदासम्म प्रदेश सरकारको सहयोग जारी रहन्छ,” उहाँले भन्नुभयो। 

थारू समुदायमा लाग्ने वङ्शाणुगत सिकलसेल रोगका बिरामीलाई सरकारले एक लाख रुपियाँ बराबरको उपचार सहुलियत दिँदै आएको छ। उपचार सहुलियत अपुग भएमा रकम थप परिमार्जन गरिने मुख्यमन्त्री शाहले बताउनुभयो।“जटिल रोग निदानका लागि गरिब, निमुखा, विपन्न र पिछडिएका वर्गलाई प्रदेश सरकारले सहयोग गर्दै जानेछ,” उहाँले भन्नुभयो। बिरामी पत्ता लगाउने उद्देश्यले सञ्चालन गरेको स्क्रिनिङ अभियानलाई प्रदेश सरकारको सामाजिक विकास मन्त्रालयले सहयोग गरेको छ। 

सिकलसेल एनिमिया र थालासेमिया रोग थारू समुदायमा बढी देखिए पनि गैरथारू समुदायमा पनि यो रोग रहेको सामाजिक विकासमन्त्री झपटबहादुर साउदले बताउनुभयो। “यो रोग गैरथारू समुदायमा पनि देखा परिरहेको छ,” उहाँले भन्नुभयो। 

यसै गरी प्रदेश सभा सदस्य गीता चौधरीले सिकलसेल र थालासेमिया थारू समुदायमा बढी देखिएकाले यो समुदाय बढी सचेत हुन आवश्यक रहेको बताउनुभयो। उहाँले प्रदेश सरकारको सहयोगमा निःशुल्क परीक्षणको अभियान सुरु भएकाले सबैलाई चेकजाँच गराउन आग्रह गर्नुभयो। 

कैलारी गाउँपालिकाका अध्यक्ष राजसमझ चौधरीले गाउँपालिकाले सिकलसेल जाँचलाई तीव्रता दिएको बताउनुभयो। सो गाउँपालिकाले विभिन्न समयमा शिविर सञ्चालन गरेर स्क्रिनिङ गर्दै आएको छ। प्रदेश सरकारको सहयोगमा असार ११ गतेसम्म स्क्रिनिङ अभियान सञ्चालन गरिने जनाइएको छ। जानकी गाउँपालिकामा पनि सिकलसेल र थालासेमियाको स्क्रिनिङ शिविर सञ्चालन गरिएको छ। जानकी गाउँपालिका–५ स्थित राष्ट्रिय आधारभूत विद्यालयमा आयोजित शिविरको मुख्यमन्त्रीले एक कार्यव्रmमका बिच उद्घाटन गर्नुभयो।