गोविन्द शर्मा
बाँके, असार ४ गते । बाँकेको जानकी गाउँपालिका –४ छत्रपुर र खजुरा गाउँपालिका –४ चल्तुवास्थित किरण नालामा निर्माणाधीन पक्की पुल असार २५ गतेसम्म सम्पन्न हुनेगरी निर्माण सम्झौता भए पनि निर्माण कार्य फाउण्डेशनमै अल्झेको छ ।
लुम्बिनी प्रदेशको सडक पूर्वाधार विकास कार्यालय नेपालगञ्जका प्रमुख ललितबहादुर न्यौपानेले पुल निर्माणका लागि जमिनमुनी निर्माण गरिनुपर्ने पायल फाण्डेशनको काम गुणस्तरीय नभएको जानकारी दिनुभयो ।
सडक पूर्वाधार विकास कार्यालयका प्रमुख न्यौपानेले भन्नुभयो, ‘कङ्क्रिटको गुणस्तरमा आशङ्का भएपछि त्यसलाई अस्वीकार गरेका छौँ, निर्माण कम्पनीसँग यसको विकल्प मागेका छौँ ।’
पायल फाउण्डेशन गुणस्तरीय नभएपछि करिब दुई वर्षदेखि पुल निर्माण कार्य अघि बढ्न नसकेको उहाँले बताउनुभयो । केही समयअघि काम अघि बढाइएको भए पनि हाल बन्द रहेको निर्माण कम्पनीले जनाएको छ ।
पुलका लागि निर्माण गरिएका ५० वटा पायलकै फाउण्डेशनमै समस्या देखिएको सडक पूर्वाधार कार्यालयले जनाएको छ । कार्यालयले पुलको सुरुवाती फाउण्डेशनमै समस्या देखिएपछि विज्ञ टोलीबाट समेत निरीक्षण गराइएको छ । विज्ञ टोलीको प्रतिवेदन र निर्माण कम्पनीले विकल्पबारे लिखित धारणा आउन बाँकी रहे पनि पुनः फाउण्डेशन बनाउनु पर्ने देखिएको प्राविधिकको भनाइ छ ।
पुल निर्माणका लागि गाल्वा सिद्धार्थ दर्शन जेभीले २०७७ फागुन १९ गते पाँच करोड ३२ लाख रुपियाँमा सम्पन्न गर्नेगरी ठेक्का सम्झौता गरेको थियो । पुलको निर्माणमा ढिलाइ भएपछि स्थानीय बासिन्दा आक्रोशित भएका छन् ।
