‘ए’ डिभिजन लिग : बढुवा दुईमध्ये एक च्याम्पियन अर्को रेलिगेसन

काठमाडौं, जेठ २८ गते । नेपाली फुटबलको सबैभन्दा ठुलो घरेलु प्रतियोगिता शहीद स्मारक ‘ए’ डिभिजन लिग चर्च ब्वाइज क्लबलाई च्याम्पियन बनाउँदै सम्पन्न भएको छ ।

डबल राउन्ड रोविन लिगमा कूल एक सय ८२ खेल सम्पन्न भएसँगै चर्च ब्वाइज ‘ए’ डिभिजनको डेब्युमै च्याम्पियन बनेको हो । ‘ए’ मा उक्लिएको पहिलो सिजन नै उपाधि उचालेको चर्च ब्वाइज लिग जित्ने १६औँ टोली बनेको  छ । संयोगवश पहिलो पटक ‘ए’ डिभिजन खेलेको एफसी खुमलटार पहिलो वर्ष नै  रेलिगेसन (‘बी’ डिभिजनमा घटुवा) मा परेको छ । 

यसअघि मनाङ मर्स्याङ्दी फुटबल क्लबले सर्वाधिक आठ पटक उपाधि उचालेको छ । रानीपोखरी कर्नर टिम (आरसिटी)ले ६ पटक लिगको उपाधि उचालेको छ । साथै चर्च ब्वाईज मनाङ मर्स्याङ्दी पछि लगातार ‘ए’, ‘बी’ र ‘सी’ डिभिजन लिग जित्ने दोस्रो टोली समेत बनेको छ ।

२०६६ सालमा स्थापना भएको चर्च ब्वाईज २०७८ मा ‘सी’ च्याम्पियन, २०७९ मा ‘बी’ डिभिजन च्याम्पियन बन्दै शीर्ष डिभिजनमा उक्लिएको थियो । यसअघि मनाङ २०४१ मा ‘सी’ च्याम्पियन हुँदै ‘बी’ डिभिजनमा उक्लिएको मनाङले २०४२ मा नै ‘बी’ च्याम्पियन र २०४३ मा ‘ए’ डिभिजन लिग च्याम्पियन भएको थियो ।

यस्तै प्रशिक्षक बालगोपाल महर्जनको नाममा पनि पहिलो लिग उपाधि हात लागेको छ । २०६१ सालमा खेलाडीको रूपमा थ्रिस्टार क्लबबाट शीर्ष डिभिजन लिगको उपाधि उचालेको बालगोपालले २०८० मा चर्च ब्वाईजलाई प्रशिक्षकको रूपमा उपाधि दिलाउन सफल हुनुभएको छ । 

खुमलटारसँगै विभागीय टोली एपिएफ क्लब रेलिगेसनमा परेको छ । लिगका साबिक विजेता मच्छिन्द्र दोस्रो, नेपाल पुलिस क्लब तेस्रो, जावलाखेल चौथो, सातदोबाटो यूथ क्लब पाँचौँ, एनआरटी छैटौँ, आर्मी सातौँ, मनाङ आठौँ, थ्रिस्टार नवौँ, सङ्कटा १०औँ, हिमालयन शेर्पा ११औँ र फ्रेन्ड्स क्लब १२औँ स्थानमा रह्यो ।

यसपटक ‘ए’ डिभिजनलिगका खेलहरू दशरथ रङ्गशालामा, एन्फा मैदान सातदोवाटो र च्यासल मैदानमा सञ्चालन भएका थिए ।