जयमान बुढा मगर
रुकुमपूर्व, वैशाख १८ गते । रुकुमपूर्व र रोल्पाका विभिन्न क्षेत्रमा गरी पाँच सय तीस रोपनी क्षेत्रफलमा लगाइएको अवैध लागु औषध अफिम प्रहरीले नष्ट गरेको छ । यसै सातामा रोल्पामा तीन सय २० र रुकुमपूर्वमा दुई सय १० गरी प्रहरीले पाँच सय ३० रोपनी क्षेत्रफलमा लगाइएको अफिम नष्ट गरेको हो ।
रुकुमपूर्वको पुथाउत्तरगङ्गा गाउँपालिकाका विभिन्न क्षेत्रमा लगाइएको दुई सय १० रोपनी क्षेत्रफलमा लगाइएको अफिम नष्ट गरिएको जिल्ला प्रहरी कार्यालय रुकुमपूर्वका प्रवक्ता एवम् प्रहरी निरीक्षक कृष्णबहादुर खत्रीले जानकारी दिनुभयो ।
यसैगरी रोल्पामा पनि प्रहरीले ठूलो परिमाणमा अवैध लागु औषध अफिम खेती नष्ट गरेको छ । उत्तरपूर्वी रोल्पास्थित थबाङ गाउँपालिका–४ र ५ उवाका करिब आधा दर्जन गाउँ र जङ्गलमा लगाइएको अफिम खेती चार दिन लगाएर तीन सय २० रोपनी क्षेत्रफलमा लगाइएको अफिम नष्ट गरिएको जिल्ला प्रहरी कार्यालय रोल्पाले जनाएको छ ।
ठूलो मात्रामा लगाइएको अफिम खेतीबारे गहिरो अनुसन्धान गरिरहेको जिल्ला प्रहरी रोल्पाका प्रहरी नायव उपरीक्षक श्याम सारुमगरले बताउनुभयो ।
अफिम खेती गर्ने र जग्गा धनीको नाम खुल्न आएमा लागु औषध नियन्त्रण ऐन अनुसार कारबाही हुने प्रहरीले जनाएको छ ।
