चराचुरी चिरबिर गर्दै
कराइसके मिठो बोली
लागिसक्यो नयाँ वर्ष
बाहिर हेर ! दैलो खोली ।
लाली चढ्यो हिमालमा,
बैँस फुल्यो मुहारमा
मखमली र सयपत्री,
फूल फुलेझैँ तिहारमा ।
वसन्तको हरियाली
छाइसक्यो वनपाखा
प्रकृति नै रमाएर
आइसक्यो आफ्नै काखा ।
तराईका हरिया फाँट
घुम्न थाले नजरभरि
हेरिरहुँ जस्तै लाग्यो
तिनलाई पनि घरीघरी ।
नयाँ जोस नयाँ रङ्ग
सबै नयाँ ल्याए जस्तो
दुनियाँका सबै खुसी
आफ्नैछेउ आएजस्तो ।
सुस्त गति होइन अब
वायुपङ्खी चलोस् चाल
सधैँभरि यसैगरी
आइरहोस् नयाँ साल ।
