लक्ष्मण पौडेल
भैरहवा, फागुन १८ गते । सवारी दुर्घटना न्यूनीकरण तथा लेन अनुशासनसम्बन्धी ट्रक तथा ट्याङ्कर चालकलाई प्रशिक्षण दिइएको छ । जिल्ला ट्राफिक प्रहरी कार्यालय, रुपन्देहीले सुरु गरेको साताव्यापी कार्यक्रम अन्तर्गत बिहीबार लुम्बिनी ट्रक यातायात व्यवसायी सङ्घको सहकार्यमा रुपन्देहीको ओमसतिया गाउँपालिका वडा ४ स्थित वसन्तपुरमा प्रशिक्षण दिइएको हो ।
नेपाल ट्रक यातायात व्यवसायी महासङ्घ लुम्बिनी प्रदेशका संयोजक यम पाण्डेले ओभरलोड बोकेर नहिँड्न चालकलाई आग्रह गर्नुभयो ।
लुम्बिनी ट्रक यातायात व्यवसायी सङ्घका अध्यक्ष विष्णुप्रसाद खरेलले सवारी चालकले आफू पनि बाँच्ने र अरूलाई पनि जोगाउने गरी सवारीसाधन चलाउनुपर्ने बताउनुभयो । उहाँले ट्रक पार्किङ गर्दा सडकभन्दा १० फिट टाढा गएर रोक्नुपर्ने बताउनुभयो ।
जिल्ला ट्राफिक प्रहरी कार्यालय, रुपन्देहीका प्रमुख प्रहरी निरीक्षक साकारराज पन्तले रुपन्देहीमा गत आर्थिक वर्षमा सवारी दुर्घटनाबाट १२२ जनाको ज्यान गएको र चालु आर्थिक वर्षमा ६२ जनाको ज्यान गइसकेको बताउनुभयो । प्रशिक्षण कार्यक्रममा १५० बढी चालकलाई प्रशिक्षण दिइएको थियो ।
