सहदेव बस्नेत
जाजरकोट, फागुन १ गते । जाजरकोट भीरबाट खसेको ढुङ्गा लागेर जाजरकोटमा मोटरसाइकलमा सवार एक युवाको मृत्यु भएको छ ।
जाजरकोटको नलगाड नगरपालिका ५, को नलगाड हाइड्रोपावरको पहुँचमार्ग अन्तर्गत गेरेनी भीर नजिक मोटरसाइकल चलाइरहेको बेला माथिबाट आएको ढुङ्गा लागेर पश्चिम रुकुम आठबिसकोट नगरपालिका ११ चौर निवासी ३२ वर्षीय अशोक खड्काको आइतबार मृत्यु भएको हो ।
खाराबाट कालीमाटीतर्फ आउँदै गरेको मोटरसाइकलमा खड्कामाथि गेरेनी भीरबाट ढुङ्गा खसेको थियो । ढुङ्गा लागेर गम्भीर घाइते भएका उनको उपचारका क्रममा स्वास्थ्य चौकी दल्लीमा मृत्यु भएको प्रहरीले जानकारी दिएको छ । मोटरसाइकलको पछाडिको सिटमा बसेका उनका साथी भने सामान्य घाइते मात्र भएका छन्
यस्तै आइतबार नै जाजरकोटमा भीरबाट खस्दा एक जनाको मृत्यु भएको छ । जिल्लाको नलगाड नगरपालिका वडा नं ३ कट्के गाँउमा घर नजिकैको भीरबाट खस्दा इन्द्रमान बहादुर रोकायको मृत्यु भएको जिल्ला प्रहरी जाजरकोटले जनाएको छ । घटनाको थप अनुसन्धान भैरहेको प्रहरीले जानकारी दिएको छ ।
