अमरराज नहर्की
तनहुँ, माघ २६ गते । तनहुँको बन्दीपुर गाउँपालिका–५ याम्पा कुमालटारीस्थित कुमालटारी कृषि फर्ममा बिहीबार दिउँसो आगलागी भएको छ । कृषि ज्ञान केन्द्र तनहुँका प्रमुख कुलप्रसाद तिवारीले सञ्चालन गरेको फर्ममा आगलागी भएको हो ।
दिउँसो साढे ३ बजेदेखि सुरु भएको आगलागी अझै नियन्त्रण आउन सकेको छैन । प्रहरी चौकी डुम्रेका प्रहरी नायब निरीक्षक विजयनाथ यादवले पराल थुप्रो ठूलो भएको र गोठमा समेत सल्किएकाले आगो निभाउन कठिन भइरहेको बताउनुभयो ।
सुरक्षाकर्मी र स्थानीय बासिन्दाको सहयोगमा आगो नियन्त्रणमा लिने प्रयास भइरहेको छ भने फर्ममा रहेका गाई तथा बाख्रालाई सुरक्षित स्थानमा सारिएको जानकारी प्रहरी नायब निरीक्षक यादवले दिनुभयो ।
यद्यपि, आगोमा परेर २० वटा कुखुरा भने जलेर मरेका छन् भने मानवीय तथा पशुको क्षति नभएको यादवले बताउनुभयो । विद्युत सट भएर आगलागी भएको अनुमान प्रहरीको छ ।
