ग्रीष्मकालीन मौसम लागेसँगै नयाँ हवाई उडान व्यवस्था लागू हुँदै

काठमाडौं, माघ १९ गते । नेपाल नागरिक उड्डयन प्राधिकरणले हवाई उडान सुरक्षित बनाउन आगामी ग्रीष्मकालीन मौसम लागेसँगै नयाँ हवाई उडान व्यवस्था लागू गर्ने भएको छ ।

प्राधिकरणले आन्तरिक हवाई उडानलाई थप सुरक्षित, भरपर्दो, मर्यादित र व्यवसायिक बनाउने उद्देश्यले उड्डयन क्षेत्रका विज्ञ तथा सरोकारवालाहरूसँग छलफल गरेर नयाँ हवाई उडान व्यवस्था लागू गर्ने लागेको हो ।

प्राधिकरणका सूचना अधिकारी ज्ञानेन्द्र भुलले हवाई उडानलाई थप सुरक्षित र भरपर्दो बनाउनका लागि हवाई उडानसम्बन्धी नयाँ व्यवस्था लागू गर्न लागेको बताउनुभयो । अन्तर्राष्ट्रिय नागरिक उड्डयन प्राधिकरणको सिकागो सम्मेलनका मापदण्ड बमोजिम ३/३ वा ६/६ महिनामा नेपालको हवाई उडान क्षेत्रको सुरक्षित बनाउनका लागि नियम परिर्माजन गर्ने गरिएको जानकारी उहाँले दिनुभयो ।

उहाँले भन्नुभयो, ‘‘नेपाल नागरिक उड्डयन प्राधिकरणले नेपालको नीति निमय र कानुन मान्छौं । तर हवाई उडानमा मुख्य नीति राष्ट्रिय नीतिहरु होइनन् । हवाई उडानमा अन्तर्राष्ट्रिय उड्डयन प्राधिकरणको सिकागो सम्मेलनका मापदपण्ड र नियममा मुख्य भएकाले सिकागो सम्मेलनको मापदण्ड बमोजिम ३/३ वा ६/६ महिनामा नेपालको हवाई उडान क्षेत्रको सुरक्षित बनाउनको लागि परिर्माजन गर्नेगर्छौं ।’’

सूचना अधिकारी भुलले २७ जनवरीदेखि ३१ जनावरीसम्म प्राधिकरण आन्तरिक र हवाई उड्डयन क्षेत्रमा लामो समय काम गरेका विज्ञहरुसँगको छलफलबाट पाँचवटा नियम लागू गर्ने तयारी गरिएको बताउनुभयो । उहाँले विमान दुर्घटना भएर नयाँ व्यवस्था लागू गर्न लागिएको नभएर प्राधिकरणको नियमित प्रक्रिया भएको जानकारी दिनुभयो ।

‘‘अहिले नयाँ वर्ष २०२३ मा २०२२ को नोभेम्बर, डिसेम्बर र जनवरी तीन महिनाको हवाई सुरक्षाको नियम पारिमार्जन गर्ने विषयमा हवाई उडानलाई कसरी सुरक्षित र भरपर्दो बनाउन के–के गर्न सकिन्छ भनेर २७ जनावरी देखि ३१ जनवरीसम्म प्राधिकरण आन्तरिक र हवाई उड्डयन क्षेत्रमा लामो समय काम गरेका यो क्षेत्रका विज्ञहरुसँग छलफल गरेर अहिले पनि अन्तर्राष्ट्रिय नागरिक उड्डयन प्राधिकरणको मापदण्ड अनुसार काम गरिरहेका छौं ।,’’ सूचना अधिकारी भुलले भन्नुभयो, ‘‘तर, पनि केही विषयहरुमा छलफलको क्रममा छौं । छलफलबाट नेपालको नागरिक उड्डयन सिस्टमका लागि जाडो महिनाकाे अन्तिमतिर आएका छौं । प्राधिकरणले हवाई उडानलाई कसरी सुरक्षित बनाउन सकिन्छ । नेपालको विमानस्थलमा हुने ल्याण्डिङ पश्चात् असुरक्षित हो कि ? भन्ने बाहिर मानिसहरूमा परेकाले प्राधिकरण हवाई उडानलाई सुरक्षित बनाउने विषयमा छलफल गरिरहेको हो ।’’

उहाँले प्राधिकरणले लागू गर्ने नयाँ व्यवस्थाअनुसार अब पाइलटले दैनिक आठ घण्टा उडान र आठ पटक मात्र अवतरण गर्न पाउने व्यवस्था गर्न लागेको बताउनुभयो । हाल दैनिक १० घण्टा उडान र १० वटा अवतरण गर्न पाउने व्यवस्था छ ।

सूचना अधिकारी भुलले आईएफआर उडान हुने विमानस्थलमा भिएफआर उडान गर्न नपाइने बताउनुभयो । पहाडी क्षेत्रमा हुने उडान सट टेक अफ ल्यान्डिङ (स्टल) मा विमान जमिनको तहबाट सधैं ५०० फिटमाथि हुनुपर्ने र सुगम क्षेत्रमा उडान गर्दा विमान जमिनको सतहबाट कम्तीमा एक हजार फिटमाथि हुनुपर्नेछ ।

सूचना अधिकारी भुलले चालक दलका सदस्यको थकानको जोखिम न्यूनीकरण गर्न उडानमा दुईभन्दा बढी चालक दलका सदस्य हुँदा थप समय उडान गर्न पाउने व्यवस्था खारेज गर्न लागेको बताउनुभयो । उहाँले वायुसेवा कम्पनीका सबै प्रशिक्षक पाइलटले विमान उत्पादक कम्पनीमा गई सीप परीक्षण गर्नुपर्ने व्यवस्था गर्न लागिएको जानकारी दिनुभयो ।