काठमाडौं, माघ १६ गते । नेकपा (माओवादी केन्द्र) को आज बसेको पदाधिकारी बैठक भोलि (मङ्गलबार) पुनः बस्ने गरी टुङ्गिएको छ ।
माओवादी केन्द्रका प्रवक्ता कृष्णबहादुर महराले पार्टीको साङ्गठानिक विषयमा हिजो र आजको पदाधिकारी बैठकबाट होमवर्क गरेर टुङ्ग्याउने कार्यतालिका रहे पनि भोलि पुनः पदाधिकारी बैठक बस्ने जानकारी दिनुभयो ।
बैठकपछि सञ्चारकर्मीसँग कुरा गर्नुहुँदै उहाँले भन्नुभयो, “हिजो, अस्तिको होमवर्क गरेको कुरालाई टुङ्गो लगाएर भोलि (मङ्गलबार) स्थायी समिति बस्ने भन्ने कुरा थियो । यो होमवर्क अझै टुङ्गेको छैन । पर्सी स्थायी समितिको बैठक बस्ने निर्णय भयो ।”
सञ्चारकर्मीको राष्ट्रपतिको निर्वाचन सम्बन्धमा उहाँले निर्वाचन आयोगले यसको मिति घोषणा गरिसकेको र कार्यतालिका निकाल्ने तयारीमा रहेको प्रतिक्रिया दिनुभयो ।
“भोलि पुनः पदाधिकारी बस्छ । राष्ट्रपति निर्वाचन सम्बन्धमा निर्वाचन आयोगले कार्यतालिका निकाल्दैछ, मिति घोषणा भइसक्यो,” महराले भन्नुभयो ।
