राजु लामिछाने
रुकुमपश्चिम, माघ १५ गते । रुकुमपश्चिमको आठबीसकोट नगरपालिका वडा २ को साजेबगरमा एक्स्काभेटर (डोजर) दुर्घटना भएको छ । दुर्घटनामा परेर एक्स्काभेटर चालक (अपरेटर) घाइते हुनुभएको छ । चालक सरोज चौधरी घाइते हुनुभएको हो ।
घाइते चौधरीको अवस्था सामान्य रहेको आठबीसकोट नगरपालिकाका प्रमुख रबी केसीले जानकारी दिनुभयो । उहाँको नगर अस्पताल राडीमा उपचार भइरहेको नगर प्रमुख केसीले बताउनुभयो । घाइते चौधरीको टाउको, घाँटी, कान लगायत शरीरका विभिन्न अङ्गमा चोट लागेको छ ।
साजेबगरदेखि पहाडागाउँ हुँदै काँडादह जोड्ने सडक निर्माणका क्रममा सडक भासिएर हुन्डाइको एक्स्काभेटर पल्टिएको हो । डोजर सडकबाट करिब १५० मिटर तल खसेको बताइएको छ ।
