काठमाडौं, माघ १२ गते । सूर्य नेपाल एनपीजीए म्याच प्ले गल्फ प्रतियोगिताको उपाधि दिनेश प्रजापतीले जित्नुभएको छ । रोयल नेपाल गल्फ क्लबमा बिहीबार सम्पन्न तीन दिने प्रतियोगिताको फाइनलमा दिनेशले रमेश अधिकारीलाई हराउनुभयो ।
सातौं वरीयताका दिनेशले १३औं वरीयताका रमेशलाई ७/६ ले पछि पार्दै उपाधि जित्नुभएको हो । दिनेशको यो खेल जीवनको पहिलो प्रोफेसनल गल्फ उपाधि हो । उपाधिसँगै दिनेशले ६० हजार रुपियाँ पुरस्कार पाउनुभयो ।
दोस्रो हुनुभएका रमेशले ४२ हजार रुपियाँ पुरस्कार पाउनुभयो । फाइनल खेल ३६ होलको थियो । बिहीबार नै तेस्रो स्थानका लागि भएको प्रतिस्पर्धामा आठौं वरीयताका धनबहादुर थापाले १०औं वरीयताका भुवनकुमार रोक्कालाई प्ले अफको पहिलो होलमा हराउनुभयो ।
धनले ३२ र भुवनले २४ हजार रुपियाँ पुरस्कार पाउनुभयो । नेपाल प्रोफेसनल गल्फर्स एसोसिएसन (एनपीजीए) ले आयोजना गरेको प्रतियोगितामा शीर्ष २०औं वरीयतामा रहेका १६ खेलाडीको सहभागिता रहेको थियो ।
सहभागि सबै खेलाडीलाई नगद पुरस्कार प्रदान गरियो । विजेतालाई प्रतियोगिताको मुख्य प्रायोजक सूर्य नेपाल प्रालिका मार्केटिङ म्यानेजर केशव प्रधानलगायतले पुरस्कार प्रदान गर्नुभएको थियो ।
