पेसागत हकहितको प्रत्याभूत हुनुपर्छ: माओवादी नेता दाहाल

ललितपुर, पुस ३० गते । नेकपा माओवादी केन्द्रका पोलिटब्युरो सदस्य महेश्वर दाहालले प्रेस सेन्टरले पत्रकारितालाई केन्द्रमा राखेर सङ्गठनलाई बलियो पार्नुपर्ने धारणा राख्नुभयो । प्रेस सेन्टर, ललितपुर जिल्ला समितिको साधारण सभामा मन्तव्य राख्नुहुँदै उहाँले पेसागत हकहितको प्रत्याभूत गर्न सम्बद्ध पक्षको ध्यानाकर्षण गर्नुभयो ।

सङ्गठनका केन्द्रीय अध्यक्ष विष्णु सापकोटाले सक्रियतापूर्वक पत्रकारहरूले काम गरेको भन्दै आगामी दिनमा पनि यसैगरी अघि बढ्न सुझाव दिनुभयो ।

न्यूनतम पारिश्रमिक निर्धारण समितिका अध्यक्ष सङ्गीता खड्कालगायतका उपस्थिति रहेको सो कार्यक्रममा जिल्लाका संस्थापक अध्यक्ष ज्ञानप्रसाद पौडेल, ललितपुर जिल्लाका अध्यक्ष रामहरि कार्कीलगायतले आगामी दिनमा सङ्गठनलाई थप जिम्मेवार बन्दै पेसागत सञ्चारकर्मीको हकहितमा काम गर्न थप जोड दिइने बत्ताउनुभयो । 

प्रेस सेन्टर, ललितपुर जिल्लाका सचिव दिपक अर्याल र कोषाध्यक्ष कृष्ण पौडेलले साधारण सभामा प्रतिवेदन पेस गर्नुभएको थियो ।