चन्द्र पन्दाक
ताप्लेजुङ, पुस १९ गते । ताप्लेजुङको सिरिजङ्घा गाउँपालिका–२ आम्बेगुदिनस्थित सङ्घीय मेलाको अवसरमा आयोजित भलिबल उपाधि थुम्बेदिनले जितेको छ । छिमेकी जिल्ला पाँचथरको नागीलाई पराजित गर्दै पाथीभरा याङ्वरक गाउँपालिका–६ थुम्बेदिन युनाइटेड क्लबले भलिबल उपाधि जितेको हो ।
भलिबल प्रतियोगिताको उपाधि जितसँगै थुम्बेदिनले ६० हजार रुपियाँ नगद पुरस्कारसाथ मेडल र प्रमाणपत्र प्राप्त गरेको छ । उपविजेता बनेको पाँचथरको नागीले ३५ हजार रुपियाँ नगदमा चित्त बुझायो ।
प्रतियोगितामा तृतीय बनेको सिदिङ्वा गाउँपालिका–७ सुरुम्खिमको लालीगुराँस युवा क्लबले नगद १० हजार रुपियाँ सान्त्वना पुरस्कार पाएको छ । एक दशक अघिदेखि लाग्दै आएको सङ्घीय मेलाको अवसरमा भलिबल प्रतियोगिता, साङ्गीतिकलगायतका गतिविधि आयोजना हुने गरेको छ ।
