फिरन्ते मान्छे प्रतीक हाम्रो कागको तिहार
सञ्चारकर्मी हुनाले पायो मान्छेको पियार ।
सुरक्षाकर्मी मान्छेको थियो सिकारी कुकुर
जीवन धान्थे सिकार खेली मृग र ढुकुर ।
किसानी जीवन प्रतीक हाम्रो गाईको तिहार
कृषिका लागि उन्नति गर्ने गोरुको तिहार ।
दाजु र बैनीबीचको धर्म–रेखा हो तिहार
पञ्चक बन्यो सभ्यता हाम्रो प्रतीक तिहार ।
हो सात रङ सूर्यको प्रतीक इन्द्रेनी साक्षी छ
चन्द्र र सूर्य आँखा हुन् हाम्रा बीचमा अग्नि छ ।
यसैले ठाडो टीका छ हाम्रो आगाको स्वभाव
दिदी र भाइ मिलाप भए हुँदैन अभाव ।
पञ्चक भन्नु मान्छेका पाँच श्रेणी हुन् जमाना
काग र कुकुर, गाई र गोरु, यम र यमुना ।
फिरन्ते अनि सिकारीपछि पशुको पालन
खेती र पाती बनेछ जाती गोरुको चलन ।
कर्तव्यनिष्ठ सभ्यता हाम्रो भाइको तिहार
विकास भयो मान्छेको तब मानियो तिहार ।
चाड छन्, हाम्रा रहस्य राम्रा कृषिमा तयार
बुझेर मानौँ चाड र पर्व, संस्कृति अपार ।
