ध्यान कुलुङ
सङ्खुवासभा, असोज १८ गते । जिल्लाको खाँदबारी नगरपालिका ९ मा पर्ने सभाखोलामा नुहाउन गएका बाबु छोरा बेपत्ता भएका छन् ।
बेपत्ता हुनेहरूमा खाँदबारी ७ का करिब ४० वर्षका तारानाथ काफ्ले र उहाँको छोरा १५ वर्षका सनम काफ्ले रहेको सङ्खुवासभा जिल्ला प्रहरी प्रमुख डिएसपी वीरेन्द्र गोदारले जानकारी दिनुभयो ।
आफ्नै गाडी लिएर सोमबार सभाखोला गएका बाबुछोरा घर नफर्केपछि प्रहरीलाई आफन्तले मङ्गलबार बिहान खबर गरेका थिए । प्रदेश १–०२–००२ च ५९२० नम्बरको बलेरो जीप, कपडा, जुत्ता, मोबाइल फोन, साबुनलगायतका सामग्री सभाखोला किनारमा भेटिएको प्रहरीले जनाएको छ ।
दुई जनामध्ये एक जना खोलामा डुबेपछि अर्कोले बचाउने क्रममा दुवै जना खोलामा डुबेको प्रारम्भिक अनुमान गरिएको डिएसपी गोदारले जानकारी दिनुभयो ।
सोमबार पानी नपरेकाले खोला केही सानो भए पनि रातिबाट नै पानी परेकाले खोलाको सतह बढेको डिएसपी गोदारले बताउनुभयो । बेपत्ता हुनेहरुको खोजी भइरहेको उहाँले जानकारी दिनुभयो ।
