काठमाडौं, असोज १७ गते । साविक विजेता रियल म्याड्रिड स्पेनिस ला लिगामा बराबरीमा रोकिएको छ । घरेलु मैदानमा आइतबार राति भएको प्रतिस्पर्धात्मक खेलमा रियल तुलनात्मक रूपमा कमजोर टोली ओसासुनासँग १–१ गोलको बराबरीमा रोकिएको हो ।
रियललाई १० खेलाडीमा समेटिएको ओसासुनाले कडा टक्कर दिएको थियो । रियलका लागि भिनिसियस जुनियरले गोल गर्नुभयो । ओसासुनाका किकेले बराबरी गोल फर्काउनुभएको थियो ।
खेलको सुरुवात देखिनै आक्रामक देखिएको रियलले पहिलो हाफको अन्तिममा गोल गरेको थियो । ४२औँ मिनेटमा भिनिसियसले गोल गर्दै घरेलु टोलीको उत्साह जगाउनुभएको थियो । उहाँले डेभिड आलाबाको पासमा गोल गर्नुभएको हो । त्यसपछि दोस्रो हाफको सुरुवातमै ओसासुनाले बराबरी गोल फर्कायो ।
किकेले ५०औँ मिनेटमा युनाई गार्सियाको पासमा गोल गर्दै पाहुना टोलीलाई खेलमा फर्काउनुभयो । तर, ७८औँ मिनेटमा ओसासुना १० खेलाडीमा समेटियो । विपक्षी करिम बेन्जेमालाई फल हानेपछि डेभिड गार्सिया सोझै रातो कार्ड पाउँदै बाहिरिनु भएको थियो ।
त्यसको फाइदा रियलले उठाउन भने सकेन । अन्तिममा खेल बराबरीमा सकियो । यस बराबरीसँगै रियलले शीर्षस्थानमा उक्लने मौका गुमाएको छ । लिगमा सात खेल सकेको रियल १९ अङ्क सहित तालिकाको दोस्रो स्थानमा छ ।
समान १९ अङ्क बनाएको बार्सिलोना गोल अन्तरका आधारमा शीर्षस्थानमा छ । रियललाई रोकेको ओसासुना १३ अङ्कसहित छैटौँ स्थानमा छ ।
अन्य खेलमा रियल सोसिडाडले गिरोनालाई ५-३ र सेल्टा भिगोले रियल बेटिसलाई १-० गोलले पराजित गरेको छ । दुवै टोली १० खेलाडीमा समेटिएको अर्को खेलमा स्पान्योल र भ्यालेन्सियाले २-२ गोलको बराबरी खेल्दै अङ्क बाँडेका छन् । एजेन्सी
