राष्ट्रिय फुटबल टोलीको घोषणा

काठमाडौं, असोज ६ गते । यही असोज ११ गते दशरथ रंगशालामा आयोजना हुने बंगलादेशसँगको मैत्रीपूर्ण फुटबल खेलका लागि २३ सदस्यीय नेपाली टोलीको घोषणा गरिएको छ । 

नेपालका कार्यवाहक प्रशिक्षक प्रदीप हुमागाईंले बिहीबार बन्द प्रशिक्षणमा रहेका ३० खेलाडीबाट अन्तिम टोलीको नाम घोषणा गर्नुभएको हो । अखिल नेपाल फुटबल संघ (एन्फा) कम्प्लेक्समा आयोजित पत्रकार सम्मेलनमा हुमागाईंले तयारी राम्रो गरेकोले घरेलु मैदानमा जितका लागि खेल्ने बताउनुभयो ।

टोलीमा पूराना र नयाँ खेलाडीको समिश्रण रहेको छ । यसअघि मुख्य प्रशिक्षक अब्दुल्लाह अलमुताईरीसँगको विवादका कारण क्याम्प छाडेका १० जना खेलाडीलाई टोलीमा राखिएको छ ।

राष्ट्रिय टोलीमा रितिक खड्का र आशिष चौधरीले पहिलो पटक स्थान बनाउनुभएको छ । चोटका कारण सुनिल बल बाहिरिनुभएको छ । कप्तानको घोषणा खेलअघि गरिने प्रशिक्षक हुमागाईंले बताउनुभयो । 

नेपाली टोली 

गोलरक्षक : किरण चेम्जोङ, विशाल श्रेष्ठ, विकेश कुथु र दीप कार्की,

रक्षक : रोहित चन्द, अनन्त तामाङ, विकास तामाङ, विकास खवास, दिनेश राजवंशी, सुमन अर्याल र रेजिन धिमाल

मिडफिल्डर : सुदीप गुरुङ, तेज तामाङ, सेसेहाङ आङदम्बे, विशाल राई, सुजल श्रेष्ठ, सुरज ज्यु ठकुरी र एरिक विष्ट

स्ट्राइकर : विमल घर्तीमगर, अन्जन विष्ट, रितिक खड्का, मनिष डाँगी र आशिष चौधरी ।