गौतम र राई सम्मानित

काठमाडौं, भदौ २७ गते । एनएसजेएफ खेल पत्रकारिता पुरस्कारबाट वरिष्ठ पत्रकार जयदेव गौतम र सुमन भोम्जन स्मृति युवा खेल पत्रकारिता पुरस्कारबाट गीता राई सम्मानित हुनुभएको छ । नेपाल खेलकुद पत्रकार मञ्च (एनएसजेएफ) ले आफ्नो २७औँ स्थापना दिवसको अवसरमा सोमबार गौतम र राईलाई सम्मान गरेको हो । 

पत्रकारद्वयलाई एक कार्यक्रमबीच राष्ट्रिय खेलकुद परिषद् (राखेप) का सदस्यसचिव टंकलाल घिसिङ, नेपाल ओलम्पिक कमिटी (एनओसी) का महासचिव निलेन्द्रराज श्रेष्ठ, नेपाल पत्रकार महासङ्घका सचिव पवन आचार्य र मञ्चका अध्यक्ष दुर्गानाथ सुवेदीले सम्मानपत्र र दोसल्ला ओढाएर सम्मान गर्नुभयो । 

खेल पत्रकारिता अवार्ड स्वरूप गौतमलाई २५ हजार रुपियाँ र सुमन भोम्जन युवा खेलकुद पत्रकारिता अवार्ड स्वरूप राईलाई एक थान ल्यापटप प्रदान गरियो । लामो समयदेखि पत्रकारितामा सक्रिय गौतम पछिल्लो समय अमेरिकामा बस्दै आउनुभएको छ ।