काठमाडौँ, भदाै २७ गते । ‘अभिव्यक्ति’ द्वैमासिक साहित्यिक पत्रिकाको निमन्त्रणामा छ दिने नेपाल भ्रमणमा आएका सातजना बङ्गलादेशी साहित्यकारको टोली आज स्वदेश फर्किएका छन् ।
बङ्गलादेश नेपाल मैत्री समाजका अध्यक्ष लायन मोशियुर अहमदको नेतृत्वमा साहित्यकारहरू डा. अन्वारा शैयद हक, प्रा.डा. दिलारा हाफिज, मोहम्मद मोसियुर रहमान, प्रा. शेलीसेन गुप्ता, गायक काजलकुमार बेनर्जी र सल्लाउद्धिन कुटु नेपाल आउनुभएकाे थियाे ।
उहाँहरुले काठमाडौँ, ललितपुर, भक्तपुर र पोखराका पर्यटकीय तथा ऐतिहासिक सम्पदाहरुको भ्रमण गर्नुका साथै शताब्दी पुरुष सत्यमोहन जोशीसँग पनि भेट गर्नुभएकाे थियाे । उहाँहरूकाे सम्मानमा काठमाडौँमा नेपाल बङ्गलादेश स्रष्टा सम्मिलन समारोहको आयोजना गरिएको थियो ।
‘अभिव्यक्ति’ साहित्यिक पत्रिकाका संस्थापक तथा संरक्षक नगेन्द्रराज शर्माले स्रष्टाहरुमा हुने गरेको आपसी भ्रमणले दुवै देशको साहित्य बलियो हुने बताउनुभयाे । उहाँले बङ्गलादेशका सातैजना स्रष्टाहरुलाई सम्मानपत्र प्रदान गर्नुभयाे ।
‘अभिव्यक्ति’ का प्रधानसम्पादक पवन आलोकको सभापतित्वमा भएको सो समारोहमा साहित्यकार रोचक घिमिरे, रामप्रसाद पन्त, प्रतीक ढकाल, प्रा.डा. लक्ष्मणप्रसाद गौतम, शङ्कर भारती, गाेरखापत्र दैनिका पूर्व सम्पादक तथा साहित्यकार श्रीओम श्रेष्ठ ‘रोदन’ र यादव भट्टराईले नेपाल र बङ्गलादेशबीचको साहित्यिक तथा सांस्कृतिक सम्बन्धको बारेमा प्रकाश पार्नुभएकाे थियाे ।साे समाराेहमा कवि उमेश राई अकिञ्चनले कविता वाचन गर्नुभएकाे थियाे ।
बङ्गलादेशका मोशियुर अहमद, सलाउद्दीन कुटुले नेपाल प्राकृतिक रुपले मात्र नभएर सांस्कृतिक र साहित्यिक दृष्टिले पनि महत्वपूर्ण भएको विचार व्यक्त गर्नुभयाे । सो अवसरमा प्रसिद्ध गायक काजलकुमार मुखर्जीले रवीन्द्रनाथ ठाकुरको प्रसिद्ध गीत ‘एक्ला चलो...’ गाउनुभएकाे थियाे ।
बङ्गलादेशी स्रष्टाहरूको सम्मानमा ललितपुर महानगरपालिकाका प्रमुख चिरिबाबु महर्जनले ललितपुरमा, भक्तपुर नगरपालिकाका प्रमुख सुनिल प्रजापतिले भक्तपुरमा, गण्डकी प्रज्ञा प्रतिष्ठानका कुलपति सूर्यबहादुर बिखर्ची, पोखरा प्रज्ञा प्रतिष्ठानका कुलपति पद्मराज ढकाल, पृथ्वीनारायण क्याम्पस, नेपाली विभागका प्रमुख प्रा.डा. कुसुमाकर न्यौपानेले पोखरामा र लायन्स क्लब अफ खानीखोलाले पनि बङ्गलादेशबाट आउनुभएका साहित्यकार तथा कलाकारको स्वागतमा विभिन्न कार्यक्रमको आयोजना गरेका थिए ।
-original-thumb.jpg)
