सुजन काफ्ले
सुजन काफ्ले
दोलखा, भदौ १७ गते । माथिबाट खसेको ढुङ्गाले लागेर दोलखामा निर्माणाधीन सासा हाइड्रोपावरमा कार्यरत एक मजदुरको मृत्यु भएको छ ।
जिल्लाको गौरीशङ्कर गाउँपालिका -५ खानी गाउँमा निर्माणाधीन सासा हाइड्रोपावरमा कार्यरत सोलुखुम्बुको लिखु पिके गाउँपालिका -५ घर भएका का २२ वर्षीय पेम्बा छिरिङ शेर्पाको माथिबाट खसेको ढुङ्गाले लागेर मृत्यु भएको जिल्ला प्रहरी कार्यालय दोलखाले जनाएको छ ।
हाइड्रोपावरको सुरुङभित्र काम गर्न शेर्पासँगै गएका सोलुखुम्बुकै खुम्बु पासाङ ल्हामु गाउँपालिका -१ घर भएका २० वर्षीय मजदुर फुर्वा ग्याल्जेन शेर्पा घाइते भएको जिल्ला प्रहरी कार्यालय दोलखाका प्रहरी निरीक्षक राजेश सिग्देलले जानकारी दिनुभयो ।
घाइते शेर्पाको सिंगटिमा रहेको रोल्वालिङ सामुदायिक अस्पतालमा उपचार भइरहेको सिग्देलले बताउनुभयो । घटनाको विषयमा थप अनुसन्धान भइरहेको जिल्ला प्रहरी कार्यालय दोलखाले जनाएको छ ।
