नमराज सुवेदी
नुवाकोट, साउन २६ गते । उत्तरगया गाउँपालिका वडा नम्बर २, भाङ्गे झरनामा पर्यटकको घुईंचो बढ्न थालेको छ । रसुवा जिल्लामा धेरै मनोरम झरनाहरु रहेको मध्ये वर्षाको समयमा मात्र बन्ने यस्ता झरनाहरु हेर्न आन्तरिक तथा वाह्य पर्यटकको घुईंचो लाग्छ ।
अहिले भाङ्गे झरनालाई बाहुबली झरना पनि भन्न थालिएको छ । झरनाको सुन्दर दृष्य अवलोकन गर्न, गर्मी छल्न रसुवा जिल्लालगायत छिमेकी जिल्ला नुवाकोट, काठमाडौंबाट समेत दैनिक एकदेखि दुई हजार पर्यटक आउने गरेको स्थानीयले जानकारी दिएका छन् ।
शनिबार र विदाको दिन प्रायः एकदेखि दुई हजार बढी पर्यटकको आवागमन हुने गर्दछ । त्यस्तै, अन्य दिन ४ देखि ५ सयभन्दा बढी पर्यटकको आवागमन हुने गर्छ ।
आन्तरिक पर्यटकहरु सुन्दर दृष्य अवलोकन गर्न, गर्मी छल्न, चिसोपनको आनन्द लिई टिकटक, फोटो र भिडियो बनाउन व्यस्त हुन्छन् ।
झरनाको पानी खस्ने स्थानसम्म पर्यटकलाई सहज रुपमा पुग्नसक्ने गरी बाटो निर्माण गरी आन्तरिक पर्यटक बढाउने गरी योजना बनाएको उत्तरगया गाँउपालिकाले जानकारी दिएको छ ।
नेपाल–चीनको अन्तराष्ट्रिय सडक बेत्रावती–मैलुङ–स्याफ्रुबेशीमा पर्ने भाङ्गे झरना सडकको मैलुङ नजिक पर्दछ ।
राम्रो व्यवस्थापन नहुँदा पर्यटकलाई असहज भएकाले सम्बद्ध पक्षको ध्यान जान आवश्यकता रहेको युवा व्यवसायी मक्कर लामाको भनाइ छ ।
