गोरखापत्र अनलाइन
काठमाडौं, साउन २० गते । सुनको औठीं र आइफोनसहित दुई जनालाई प्रहरीले पक्राउ गरेको छ । पक्राउ पर्नेमा सल्यानको कालिमाटी गाउँपालिका–३ स्थायी घर भएका भुपेन्द्र घर्ती मगर र सिन्धुपाल्चोक ठूलोपाखर गाउँपालिका–८ स्थायी घर भएका भिमबहादुर तामाङ रहेका छन् ।
हिमालय एयरलाइन्सको जहाजमा दुबईबाट काठमाडौं र्आएका दुवैजनाबाट सो सामग्री बरामद गरिएको प्रहरीले जनाएको छ । ती जहाजमा आएका दुबै जनाको गतिविधि संकास्पद देखिएपछि त्रिभुवन अन्तर्राष्ट्रिय विमानस्थलको आगमन टनेल गेटबाट दुवैलाई नियन्त्रणमा लिई चेकजाँच गर्दा ती सामान फेला परेको प्रहरीले जनाएको छ ।
मगरको साथबाट एक थान सुनको बेरुवा औठी, तीन थान आइफोन र तामाङको साथबाट एक थान सुनको औठी, दुई थान आइफोन प्लस आठ र एक थान आइफोन प्लस सात गरी जम्मा अन्दाजी तीन लाख बीस हजार मूल्य बराबरको सामान प्रहरीले फेला परेको जनाएको छ ।
अवैधरुपमा भन्सार छलेर ती सामान लैजान लागेको अवस्थामा प्रहरीले फेला पारेको जनाएको छ । थप अनुसन्धान र कारबाहीका लागि त्रिभुवन विमानस्थल भन्सार कार्यालय, गौचरमा बुझाएको प्रहरीको भनाइ छ ।
