धेरैपछि लेख्न बसेँ, गजल बन्यो कि गीत बन्यो
कथा भयो या कविता, भग्न मनको मित बन्यो ।
अस्ताचलमा डुबे रवि, अन्धकार छ पूर्व क्षितिज
तप्किएर आँखा राति बिहानीको शीत बन्यो ।
बढ्न थाले राता बाकस एयरपोर्टको आँगनीमा
फेरि पनि रियल, दिराम निक्कै गाढा प्रीत बन्यो ।
खरानीको आगो झनै डरलाग्दो हुँदो रहेछ
सिमानाको नक्सा जब छिमेकीको जित बन्यो ।
जुनै जोगी आए पनि चिरिएकै छन् कान
अंशबन्डा, मनबन्डा यस्तै अचेल रीत बन्यो ।
