अमरराज नहर्की
तनहुँ, फागुन २० गते । निर्वाचन र सार्वजनिक बिदामा पनि तनहुँ जिल्ला अदालत खुला रहने भएको छ । बिहीबार हुने प्रतिनिधि सभा सदस्य निर्वाचनका अवसरमा सरकारले फागुन २० देखि २२ गतेसम्म सार्वजनिक बिदा दिएको तथा फागुन २४ गते अन्तर्राष्ट्रिय महिला दिवसको बिदा परेकाले सो अवधिमा पनि अत्यावश्यक न्यायिक सेवालाई निरन्तरता दिन तनहुँ जिल्ला अदालत खुल्ने भएको हो ।
बन्दीप्रत्यक्षीकरणको रिट दर्ता तथा पक्राउ पूर्जी जारी गर्न अनुमति प्रदान गर्ने जस्ता कार्यहरू प्रभावित नहोस् भन्ने उद्देश्यले अदालतले यो विशेष व्यवस्था गरेको हो ।
न्याय प्रशासन ऐन, २०७३ को दफा २६ बमोजिम बन्दीप्रत्यक्षीकरणको रिट निवेदन दर्ता गरी सुनुवाइ गर्न तथा मुलुकी फौजदारी कार्यविधि संहिता, २०७४ को दफा ९ अनुसार पक्राउ पूर्जी जारी गर्न अनुमति दिने कार्यका लागि अदालत खुला रहने व्यवस्था गरिएको श्रेस्तेदार नन्दप्रसाद आचार्यले जानकारी दिनुभयो ।
उहाँका अनुसार निर्वाचनको दिन फागुन २१ गते र शनिबार परेकाले २३ गते भने अदालत पूर्ण रूपमा बन्द रहनेछ । तर फागुन २०, २२ र २४ गते बिहान ११ देखि अपराह्न ३ बजेसम्म विशेष कामका लागि अदालत खुला रहनेछ । निर्वाचन तथा सार्वजनिक बिदाका कारण नागरिकको मौलिक अधिकारसँग सम्बन्धित कानुनी विषयहरू प्रभावित नहोस् भन्ने उद्देश्यले यो निर्णय गरिएको अदालत प्रशासनले जनाएको छ ।
-original-thumb.jpg)
-square-thumb.jpg)
-original-thumb.jpg)
