ऋत र ग्रिनल्यान्ड सेमिफाइनलमा

काठमाडौं, असार ३२ गते । ऋत एकेडेमी ‘ए’ र ग्रिनल्यान्ड ‘बी’ प्रथम एन्जल्स एसइइ कप थ्री अन थ्री छात्र बास्केटबल प्रतियोगितामा शनिबार सेमिफाइनलमा प्रवेश गरेका छन् । एन्जल्स हार्ट माबि र कलेजको संयुक्त आयोजनामा भएको प्रतियोगितामा ऋत ‘ए’ ले महामञ्जुश्रीलाई १०–८ ले हरायो । ग्रिनल्यान्ड ‘बी’ ले न्यु जेनिथ ‘ए’ लाई ८–७ ले हरायो ।

प्रतियोगितामा नवज्योति र न्यु जेनिथ ‘बी’ ले पनि सेमिफाइनलमा स्थान सुरक्षित गरेका छन् । नवज्योतिले ऋत ‘बी’ लाई ७–४ तथा न्यु जेनिथ ‘बी’ ले लालीगुराँसलाई ८–७ ले पाखा लगायो । सेमिफाइनलमा नवज्योतिको भेट न्यु जेनिथ ‘बी’ सँग हुनेछ भने ऋत ‘ए’ ले ग्रिनल्यान्ड ‘बी’ को सामना गर्नेछ ।

प्रतियोगिताको एन्जल्स हार्ट कलेजका प्रिन्सिपल दिलबहादुर बुढाथोकीले एक कार्यक्रमबीच उद्घाटन गर्नुभयो । प्रतियोगिताको विजेताले १० हजार र उपविजेताले सात हजार रुपियाँ पुरस्कार प्राप्त गर्नेछन् । आइतबार सम्पन्न हुने नकआउट प्रतियोगितामा ६६ टोली सहभागी छन् ।