काठमाडौँ, भदौ १४ गते। पूर्व मन्त्री एवम् मोरङ–४ का प्रतिनिधि सभा सदस्य अमनलाल मोदीले सांसद जनताप्रति जवाफदेही बन्नुपर्नेमा जोड दिनुभएको छ। गोरखापत्र अनलाइनको साप्ताहिक कार्यक्रम ‘सांसदलाई सवाल’मा कुराकानी गर्नुहुँदै मोदीले सत्ता पक्ष र प्रतिपक्षी सबै दलका सांसद जनताप्रति जवाफदेही बन्नुपर्ने भन्दै यस्तो बताउनुभएको हो। उहाँले जनताको दुःखको साथी बन्ने प्रयासमा रहेको भन्दै सांसद मोदीले भन्नुभयो, ‘म जनताको सुखमा साथी हुन सके कि सकिँन थाहा छैन। यदि मैले थाहा पाएँ भने दुःखको साथी अवश्य हुन्छ।’’ कुराकानीका क्रममा उहाँले संविधान निर्माणमा माओवादी पार्टी पूर्ण समानुपातिक निर्वाचन प्रणाली र प्रत्यक्ष निर्वाचित राष्ट्रपतिको विषयमा चुकेको स्वीकार गर्नुभयो। संसद्को सार्वजनिक लेखा समिति सदस्यसमेत रहनुभएका मोदीले समिति नेतृत्व विवादमा हुँदा सुशासनको विषयमा प्रश्न उठेको दाबी गर्नुभयो। संसदीय अभ्यास अनुसार यो समितिको नेतृत्व प्रतिपक्षी दलले पाउनुपर्नेमा उहाँले जोड दिनुभयो।
सांसद मोदीको जन्म २०४२ साल असोज ५ गते मोरङको बुढीगङ्गामा बुवा पवनलाल र आमा बलोदेवीको कोखबाट भएको हो। उहाँ बाल्यकालमै बुवाको मायाबाट टाढा हुनुभयो। उहाँका पिता पवनलालको उहाँ पाँच वर्षकै हुँदा निधन भएको थियो। बुवाको अभिभावकत्व नपाए पनि आमाले सात जना छोराछोरीलाई सङ्घर्ष गरेर हुर्काउनुभयो।
कक्षा ९ मा पढ्दै गर्दा तत्कालीन माओवादी निकट विद्यार्थी सङ्गठन अखिल क्रान्तिकारीको सदस्य बन्नुभएका मोदी महेन्द्र मोरङ क्याम्पसमा अध्ययन गर्दागर्दै राजनीतिमा सक्रिय हुनुभएको हो। उहाँले २०५५–५६ सालमा अखिल क्रान्तिकारीमा आबद्ध हुँदै राजनीति सुरु गर्नुभएको हो। माओवादी युद्धताका उहाँले केही समय बन्दी जीवन बिताउनुभएको छ। २०६० सालमा उहाँले २६ महिना बन्दी जीवन बिताउनुभयो। शान्ति प्रक्रियापछि भने उहाँ राजनीतिमा थप सक्रिय हुनुभयो। २०६२ सालमा अनेरास्ववियु क्रान्तिकारी अध्यक्ष बन्नुभयो। त्यसपछि उहाँ नेकपा (माओवादी) जिल्ला सदस्य, प्रदेश सदस्य हुँदै अहिले केन्द्रीय सदस्य हुनुहुन्छ।
थारू राष्ट्रिय मुक्ति मोर्चा, नेपालको कोचिला संयोजक हुँदै उहाँले मोर्चाको केन्द्रीय सचिव बनेर काम गर्नुभयो। २०७० सालमा समानुपातिक तर्फबाट संविधानसभा सदस्य बन्नुभएका मोदी मोरङ चार बाट त्यसपछि दुई पटक प्रत्यक्ष निर्वाचित हुनुभएको छ। २०७४ र २०७९ मा उहाँ मोरङ–४ बाट प्रतिनिधि सभा सदस्यका रूपमा प्रत्यक्ष निर्वाचित हुनुभएको हो। उहाँसँग सात महिना सामान्य प्रशासन मन्त्री बनेर काम गरेको अनुभव छ।
स्नातक तहको पढाइ पूरा गर्नुभएका मोदी अहिले स्नातकोत्तर तहको अध्ययन गर्दै हुनुहुन्छ। सांसद मोदीले भारत, चीन, अमेरिका, साउदी अरब, फ्रान्स, जर्मनी, बेलायत, केन्या, दक्षिण कोरिया, ओमानलगाय मुलुकको भ्रमण गर्नुभएको छ। स्पष्ट वक्ता मोदी प्रतिनिधि सभाको बैठकमा नीतिगत छलफल र जनजीविकाका सवालमा निरन्तर आवाज उठाइरहनुहुन्छ। अहिले उहाँ सार्वजनिक लेखा समिति सदस्यसमेत हुनुहुन्छ।
प्रस्तुत छ– पूर्व मन्त्री, नेकपा (माओवादी केन्द्र)का केन्द्रीय सदस्य एवम् मोरङ–४ का प्रतिनिधि सभा सदस्य अमनलाल मोदीसँग गोरखापत्र अनलाइनको ‘सांसदलाई सवाल’को ५८ औं शृङ्खलामा दिनेश लुइटेलले गरेको कुराकानीका आधारमा मनोजरत्न शाही र केशब गुरुङले तयार पार्नुभएको भिडियो सामग्रीः
