तेहरान, असार २४ गते । इरानी राष्ट्रपति मसुद पेजेस्कियानले संयुक्त राज्य अमेरिकासँग नयाँ वार्ताको समर्थन गरेपछि मङ्गलबार आलोचनाको सामना गर्नु परेको छ । आलोचकहरूले मुलुकमा गत महिनाको आक्रमणपछि उहाँमाथि ‘धेरै नरम’ भएको आरोप लगाएका छन् ।
अमेरिकी मिडिया व्यक्तित्व टकर कार्लसनसँगको अन्तर्वार्ता जारी भएपछि यस्तो आलोचना आएको हो । अन्तर्वार्तामा पेजेस्कियानले दुवै पक्षबिच विश्वास पुनर्निर्माण भएमा इरानलाई वार्ता पुनः सुरु गर्न ‘कुनै समस्या नभएको’ बताउनुभएको थियो । उहाँका यी टिप्पणी जुन १३ मा इजरायलले इरानमा वरिष्ठ सैन्य कमान्डरहरू र आणविक वैज्ञानिकहरूलाई मार्ने अभूतपूर्व बमबारी अभियान सञ्चालन गरेको एक महिना नपुग्दै आएका हुन् ।
इजरायली आक्रमणहरू आणविक वार्ता पुनर्जीवित गर्ने उद्देश्यले तेहरान र वासिङ्टनबिच योजनाबद्ध बैठकको दुई दिन अगाडि भएका थिए । त्यसयता वार्ता ठप्प भएको छ । “के तपाईंले बिर्सनुभयो कि यी अमेरिकीहरूले नै यहुदीवादीहरूसँग मिलेर वार्तालाई समय किन्न र आक्रमणको तयारी गर्न प्रयोग गरेका थिए ?”, कट्टरपन्थी कैहान अखबारको सम्पादकीयले भनेको छ । उक्त अखबारले पश्चिमसँगको संलग्नताको लामो समयदेखि विरोध गर्दै आएको छ ।
अप्रिल १२ देखि इरानसँग वार्ता गरिरहेको संयुक्त राज्य अमेरिकाले इजरायलसँग मिलेर जुन २२ मा फोर्डो, इस्फहान र नातान्जमा इरानी आणविक साइटहरूलाई लक्षित गरी आफ्नै आक्रमणहरू सञ्चालन गरेको थियो । रूढिवादी जाभान दैनिकले पनि पेजेस्कियानलाई निशाना बनाएर उहाँको टिप्पणी ‘अलि धेरै नरम’ देखिन्थ्यो भनेको छ ।
“हामी विश्वास गर्छौं कि अमेरिकी प्रस्तुतकर्तासँगको कुराकानीको वास्तविक अर्थ तब व्यक्त हुन्छ जब शब्दहरूले जनताको रिस र अमेरिकाप्रति पूर्ण अविश्वासलाई प्रतिबिम्बित गर्दछ”, यसले भन्यो । यसको विपरीत, सुधारवादी हाम मिहान अखबारले पेजेस्कियानको ‘सकारात्मक दृष्टिकोण’ को प्रशंसा गरेको छ । “यो अन्तर्वार्ता धेरै पहिले नै गर्नुपर्ने थियो”, यसले लेखेको छ, “इरानी अधिकारीहरू दुर्भाग्यवश लामो समयदेखि अन्तर्राष्ट्रिय र अमेरिकी मिडिया परिदृश्यबाट अनुपस्थित छन् ।”
इरानी अधिकारीहरूले इजरायली आक्रमणमा कम्तीमा एक हजार ६० जनाको मृत्यु भएको बताएका छन् । बदलामा, इजरायलमा ड्रोन र मिसाइल आक्रमणको लहरहरूले कम्तीमा २८ जनाको मृत्यु भएको अधिकारीहरूले बताएका छन् । जुन २४ देखि इरान र इजरायलबीच युद्धविराम जारी छ । रासस/एएफपी
