भारतको बङ्गलादेश क्रिकेट भ्रमण पुनर्निर्धारित हुनसक्छ

ढाका, असार १८ गते । भारत सरकारबाट स्वीकृति आवश्यक पर्ने भएकाले भारतको अगस्टमा हुने बङ्गलादेशको सेतो बल (ह्वाइट बल) को भ्रमण पुनर्निर्धारित हुनसक्ने बङ्गलादेशका एक वरिष्ठ क्रिकेट अधिकारीले बुधबार बताएका छन् ।

तीन एकदिवसीय र तीन टी-२० खेलसहित यो शृङ्खला अगस्ट १७ देखि ढाकामा सुरु हुने तालिका छ । यद्यपि बङ्गलादेश क्रिकेट बोर्ड (बिसिबी) मिडिया कमिटीका अध्यक्ष इफ्तिखार रहमानले यसको भारतीय समकक्ष बिसिसिआईले उहाँहरूलाई भ्रमण ढिलाइ हुनसक्ने जानकारी दिएको बताउनुभयो ।

बिसिसिआईले यस भ्रमणका बारेमा कुनै टिप्पणी गरेको छैन । “यो भ्रमण एफटिपी (अन्तर्राष्ट्रिय क्रिकेट काउन्सिलको भविष्य भ्रमण कार्यक्रम) को हिस्सा हो त्यसैले रद्द गर्ने विकल्प छैन । तर यसलाई पारस्परिक रूपमा सुविधाजनक समयमा पुनर्निर्धारित गर्न सकिन्छ”, रहमानले थप विवरण नदिई भन्नुभयो ।

बिसिबीका स्रोतहरूका अनुसार भ्रमण भारत सरकारको सहमतिको सङ्केतको प्रतीक्षामा छ । सन् २०२४ अगस्टमा बङ्गलादेशको जन विद्रोहले तत्कालीन प्रधानमन्त्री शेख हसिनालाई अपदस्थ गरेपछि ढाका र नयाँदिल्लीबिच हालैको कूटनीतिक तनावपछि यो अनिश्चितता आएको हो । बङ्गलादेशले सन् २०२४ सेप्टेम्बर-अक्टोबरमा दुई टेस्ट र दुई टी-२० खेलका लागि भारतको भ्रमण गरेको थियो । रासस/एएफपी