राजु लामिछाने/ मुसीकोट समाचारदाता
रुकुम पश्चिम, जेठ ३१ गते । प्रहरीले बलात्कार प्रयास गरेको आरोपमा एक पुरुषलाई पक्राउ गरेको छ । दाङको तुलसीपुर उपमहानरपालिका–७ निवासी ३६ वर्षीय रामबहादुर ओलीलाई पक्राउ गरेको जिल्ला प्रहरी कार्यालय रुकुम पश्चिमले जनाएको छ ।
प्रहरी नायब उपरीक्षक विष्णुप्रसाद सोतीका अनुसार गत आइतबार साँझ मुसिकोट नगरपालिका–१ खलङ्गास्थित झोलुङ्गे पुल (भाइरल पुल) नजिक ओलीले खलङ्गा बजारबाट जाँदै गरेकी महिलालाई बलात्कार प्रयास गरेका थिए ।
जबरजस्ती गर्न खोजेपछि महिलाले प्रतिकार गरेको र ओलीले नजिकैको पुलबाट खसाइदिने भन्दै लछारपछार गर्दा स्थानीयले प्रहरीलाई खबर गरेका थिए । लगत्तै प्रहरीले ती पुरुषलाई नियन्त्रणमा लिएको थियो ।
जिल्ला प्रहरी कार्यालयले जबरजस्ती करणी उद्योगमा मुद्दा दर्ता गरेर घटनाबारे थप अनुसन्धान भइरहेको जनाएको छ । सोमबार थप अनुसन्धानका लागि अदालतबाट म्याद समेत थप गरिएको प्रहरी नायब उपरीक्षक सोतीले जानकारी दिनुभयो । आरोपी ओलीको मानसिक सन्तुलन ठिक नभएको बताइएको छ ।
