टोकियो, चैत २६ गते । जापानका प्रधानमन्त्री शिगेरु इशिबाले जापानले अमेरिकी राष्ट्रपति डोनाल्ड ट्रम्पलाई अमेरिकी करबाट राहत पाउनका लागि आवश्यक ‘प्याकेज’ उपलब्ध गराउने र कर छुटको प्रस्ताव गर्ने बताउनुभएको छ । अमेरिकी राष्ट्रपति डोनाल्ड ट्रम्पसँग २० मिनेट लामो कुराकानी भएको हुनसक्ने अनुमानहरू जापानी सञ्चारमाध्यमबाट आएका छन् ।
जापानी कम्पनीहरू संयुक्त राज्य अमेरिकामा सबैभन्दा ठुलो विदेशी लगानीकर्ताहरूमध्ये एक हुन् तर ट्रम्पले गत हप्ता विश्वव्यापी ‘पारस्परिक’ करको एक भागको रूपमा नजिकको अमेरिकी सहयोगीबाट आयातमा २४ प्रतिशत भारी कर लगाउने निर्णय सार्वजनिक गर्नुभएको छ ।
सरकारी प्रसारक एनएचके र अन्य जापानी सञ्चारमाध्यमले सोमबार साँझ इशिबा र ट्रम्पबिच फोनबाट कुराकानी भएको अनुमान गरिएको तर यसको तत्काल पुष्टि कुनै पनि नेताले नगरेका जनाएका छन् ।
इशिबाले सोमबार संसदमा भन्नुभयो, “हामीलाई विश्वास छ कि हामीले प्याकेजमा सहमति गर्नुपर्छ टुक्रा–टुक्रा गरेर सहमति गर्नु सम्भव छैन । उहाँले अलास्कामा प्राकृतिक ग्यास पाइपलाइन परियोजनामा जापानको संलग्नता पनि समावेश हुन सक्ने बताउनुभयो ।
गत फेब्रुअरीमा ह्वाइट हाउसमा इशिबासँगको वार्तापछि ट्रम्पले जापान ‘विशाल’ अमेरिकी परियोजनामा साझेदार हुने बताउनुभएको थियो ।
अमेरिकी राष्ट्रपतिले गत हप्ता करको घोषणा गरेदेखि नै जापानी अधिकारीहरूले इशिबा र ट्रम्पबिच फोन वार्ताको व्यवस्था मिलाउने प्रयास गरिरहेका छन् । जापानको मुख्य स्टक इन्डेक्स निक्केई २२५ सोमबार करिब आठ प्रतिशतले ओरालो लागेको छ ।
जापान बिजनेस फेडेरेसन (केइडानरेन) ले सोमबार भनेको छ, “विश्व स्वतन्त्र व्यापार कायम राख्न सकिन्छ कि सकिँदैन भन्ने ‘दोबाटो’मा उभिएको छ ।”
“दोस्रो विश्वयुद्धको अन्त्यदेखि नै स्वतन्त्र व्यापार प्रणाली र स्वतन्त्र व्यापारको माध्यमबाट विश्व फस्टाएको छ। यस प्रणालीको पछाडिको प्रेरक शक्ति संयुक्त राज्य अमेरिका हो,” अध्यक्ष मासाकाजु तोकुराले एक पत्रकार सम्मेलनमा भन्नुभयो ।
तोकुराले भन्नुभयो, “अमेरिका आफैले (अहिले) कर बढाएको छ, र संरक्षणवादी कदमहरू प्रतिक्रियामा देखा परेका छन् किनभने विभिन्न देशहरूले यी कदमहरूको प्रतिकार गर्न आवश्यक छ ।”
उहाँले भन्नुभयो, “यसलाई नाटकीय तरिकाले भन्नुपर्दा, हामी स्वतन्त्र व्यापार व्यवस्था कायम राख्न सकिन्छ कि सकिँदैन भन्ने दोबाटोमा उभिनु अत्यावश्यकताको भावना राख्छौं ।”
ट्रम्पले संयुक्त राज्य अमेरिका भित्रिने कारहरूमा पनि २५ प्रतिशत करको घोषणा गर्नुभएको छ जुन जापानी आयातमा २४ प्रतिशत करको समानान्तर छ र यो निर्णय यसै हप्तादेखि लागू हुनेछ ।
कार उत्पादन जापानको एक प्रमुख स्तम्भ हो र यसले प्रत्यक्ष वा अप्रत्यक्ष रूपमा लगभग ५६ लाख मानिसहरूलाई रोजगार दिएको छ। जापानले गत वर्ष अमेरिका निर्यात गरेको २१.३ ट्रिलियन येन (१४२ अर्ब अमेरिकी डलर) को करिब २८ प्रतिशत हिस्सा सवारी साधनले ओगटेको थियो । रासस/एएफपी
