अमरराज नहर्की
तनहुँ, चैत २२ गते । विस्तारको काम भइरहेको पृथ्वीराजमार्गको मुग्लिन–पोखरा सडकअन्तर्गत पृथ्वी राजमार्गको पूर्वी खण्डको ६६ किमी सडकमा अन्तिम चरणको कालोपत्र पूरा भएको छ ।
पहिलो चरणमा ६ सेन्टिमिटर मोटाइको सडक कालोपत्र गरिएको सो दुरीमा दोस्रो चरणमा चार सेमी गरी कुल १० सेन्टिमिटरको गरी अन्तिम चरणको कालोपत्र गरिएको पूर्वीखण्डका सूचना अधिकारी इन्जिनियर विष्णुप्रसाद पाण्डेले जानकारी दिनुभयो । पाण्डेका अनुसार यस खण्डमा हालसम्म ७५ किलोमिटर कालोपत्रे पूरा भएको छ ।
तनहुँको आँबुखैरेनीदेखि जामुनेसम्मको पूर्वी खण्डमा हालसम्म चार लेन र दुई लेन गरी सो दुरीमा कालोपत्रे भएको हो । इन्जिनियर पाण्डेले भन्नुभयो, “हालसम्म कालोपत्रे भएको खण्डलाई दुई लेनमा हिसाब गर्दा ७५ किलोमिटर दुरी कालोपत्रे भएको छ ।”
काम चाँडै सम्पन्न गर्न तदारुकताका साथ गरिरहेको र हालसम्म ८२ प्रतिशत भौतिक प्रगति भएको उहाँले जानकारी दिनुभयो । पाण्डेका अनुसार दायाँ ३७ र त्यस्तै बायाँ ३७ गरी ७४ र एक किलोमिट एक तर्फी गरी ७५ किलोमिटरमध्ये ६६ किलोमिटरमा अन्तिम कालोपत्रे (डबल लेयर) सकिएको हो । पूर्वी खण्ड अन्तर्गत हाल बन्दीपुर गाउँपालिकाको वडा नम्बर १ र ४ गरी मा पर्ने डुम्रे बजारमा दुवैतर्फीको कालोपत्रे पूरा भएको छ । सदरमुकाम दमौली बजारमा समेत कालोपत्रे सुरु भएको छ । दमौलीस्थित व्यास नगरपालिका–२, बागबजारमा एकतर्फी कालोपत्रे सकेर अर्कोतर्फ कालोपत्रेका लागि सडक सम्याउने काम भइरहेको छ । वर्षायाम अघि नै यहाँ कालोपत्र पूरा गर्ने योजना छ ।
पूर्वी खण्डमा २०७७ साल माघ १७ गते सम्झौता भई २०७८ वैशाख २ गतेदेखि काम सुरु भएको थियो । पूर्वी खण्डको ठेक्का चाइना कम्युनिकेसन कन्स्ट्रक्सनले पाएको छ । २०२६ सालमा रेखाङ्न भएको सडकमा सवारीको चाप बढ्दै गएपछि एसियाली विकास बैङ्क (एडिबी) को ऋण सहयोगमा सडक चार लेनको बनाउन लागिएको हो ।
पूर्वी खण्डको छ अर्ब २१ करोड ३१ लाख १३ हजार रुपियाँमा ठेक्का लागेको छ । विसं २०८१ वैशाखसम्म काम सम्पन्न गर्नेगरी सम्झौता गरेको थियो । हाल पुन : म्याद थप गरी निर्माण कार्यलाई निरन्तरता दिइएको छ ।
