जिल्लाकै ठुलो हाइड्रोपावरको विद्युत उत्पादन सुरु

साहारा लिम्बू

फुङलिङ, चैत २२ गते । करिब एक महिनादेखि बन्द रहेको जिल्लाकै ठुलो हाइड्रोपावरको विद्युत उत्पादन सुरु भएको छ । गत फागुन २८ गतेबाट उत्पादन ठप्प भएको सानिमा मिडल तमोर हाइड्रोपावर लिमिटेडको विद्युत गएराति (शुक्रबार राति) १ बजेदेखि उत्पादन सुरु भएको हो । 

७३ मेगावट क्षमताको हाइड्रोपावरमा हाल २४ मेगावट मात्रै विद्युत उत्पादन भइरहेको जनसम्पर्क अधिकृत करण गौतमले जानकारी दिनुभयो । सुक्खायामको समयमा नदीमा पानीको मात्रा कम भएकाले २४ मेगावट मात्रै विद्युत उत्पादन भइरहको उहाँको भनाइ छ । 

आयोजनाको ड्यामसाइट तथा विद्युत गृहको उपकरणको मर्मत कार्य सम्पन्न हुन साथ गएरातिदेखि नै विद्युत उत्पादनको कार्य सुरु गरिएको गौतमले जानकारी दिनुभयो । उहाँका अनुसार मर्मतको  कार्य चाँडै सम्पन्न गर्न २४ सै घण्टा जनशक्ति परिचालन गरिएको थियो  । 

करिब एक वर्ष अगाडिदेखि उत्पादन सुरु गरेको आयोजनाको विद्युत कोशी करिडोर प्रसारण लाइनमा जडान गरिएको छ ।