काठमाडौँ, चैत २२ गते । काठमाडौँ महानगरपालिकाका प्रमुख प्रशासकीय अधिकृत सरोज गुरागाईं करिब पाँच महिनापछि महानगरको कार्यकारी अधिकृतको जिम्मेवारीमा फर्किनुभएको छ ।
उहाँ बिहीबार कार्यालयमा उपस्थित भएर कार्यभार पुनः ग्रहण गर्नुभएको महानगरपालिकाका प्रशासन प्रमुख ध्रुव काफ्लेले जानकारी दिनुभयो । गएको पुस ८ गतेदेखि महानगरको प्रमुख प्रशासकीय अधिकृत सरोज गुरागाईं कार्यालयमा उपस्थित हुनुभएको थिएन ।
प्रमुख प्रशासकीय अधिकृतको कार्यकक्षमा लगाइएको ताल्चा खोलेर उहाँ जिम्मेवारीमा फर्किनुभएको हो । महानगरका उपप्रमुख सुनिता डङ्गोलसहित विभिन्न वडाका अध्यक्ष र कर्मचारीको उपस्थितिमा प्रमुख प्रशासकीय अधिकृत गुरागाईं आफ्नो कार्यकक्षमा प्रवेश गर्नुभएको थियो ।
प्रमुख कार्यकारी अधिकृत गुरागाईं कार्यकक्ष प्रवेशका क्रममा कर्मचारी उहाँको पक्षमा र विपक्षमा उभिएका थिए । प्रमुख प्रशासकीय अधिकृत नहुँदा शिक्षकहरू चार महिनादेखि र अन्य कर्मचारी विगत तीन महिनादेखि तलब खान पाएका छैनन् भने अन्य आर्थिक कारोबार ठप्प छन् ।
तलब खुवाउने प्रक्रिया आजबाट सुरु
जिम्मेवारीमा फर्कंदै प्रमुख प्रशासकीय अधिकृत गुरागाईंले शुक्रबारबाट नै नियमित कार्यालय आउने र अवरोध भएका कामलाई निरन्तरता दिने बताउँदै उहाँले महानगरका कर्मचारी, श्रमिक र शिक्षकलाई तलब खुवाउने प्रक्रिया सुरु गर्ने प्रतिबद्धता व्यक्त गर्नुभयो । उहाँले भन्नुभयो, “मेरो पहिलो काम तलब निकासा नै हो । कर्मचारीका तीन महिना र शिक्षकका पाँच महिनादेखि तलब रोकिएको छ । त्यो निकासा गर्न शुक्रबारबाट नै प्रक्रिया सुरु गर्छु ।”
त्यसै गरी महानगरद्वारा सञ्चालित विभिन्न पूर्वाधार निर्माणलगायतको कामको जिम्मेवारी पाएका कम्पनीको समेत भुक्तानी प्रक्रिया सुरु गरिने उहाँको भनाइ छ । उद्योग, वाणिज्य तथा आपूर्ति मन्त्रालयमा कार्यरत रहनुभएका गुरागाईंलाई गत भदौ २७ गते बसेको मन्त्रीपरिषद्को बैठकले काठमाडौँ महानगरपालिकामा सरुवा गरेको थियो ।
प्रमुख प्रशासकीय अधिकृतको अभावमा दैनिक प्रशासन र आर्थिक गतिविधि अवरुद्ध हुनुका साथै कर्मचारीको तलबसमेत रोकिएको छ । आर्थिक अधिकार प्रमुख प्रशासकीय अधिकृतसँग मात्र हुन्छ । करिब २५ अर्ब रुपियाँ बजेट रहेको काठमाडौँ महानगरपालिकाको प्रमुख प्रशासकीय अधिकृतले मासिक दुई अर्बभन्दा बढी रकम खर्च गर्नुपर्ने हुन्छ ।