गोरखापत्र समाचारदाता
काठमाडौँ, चैत २१ गते । नेपाल सङ्गीत तथा नाट्य प्रज्ञा–प्रतिष्ठानले आयोजना गरेको सप्ताहव्यापी नृत्यक्षर विज्ञान प्रशिक्षणमा ४० जना नृत्यकारले नृत्यसम्बन्धी व्याकरणीय कला सिकेका छन् । प्रतिष्ठानको नृत्य विभागद्वारा आयोजित प्रशिक्षणमा प्रशिक्षार्थीले सैद्धान्तिकसँग प्रयोगात्मक प्रशिक्षणसमेत लिएका छन् ।
प्रशिक्षण समापन समारोहका नृत्य निर्देशक थापाले प्रशिक्षार्थीलाई प्रमाणपत्र वितरण गर्दै प्रशिक्षणले नृत्य कलाकारमा व्यावहारिकसँगै सैद्धान्तिक ज्ञान बृद्धि भएको बताउनुभयो । प्रतिष्ठानका उपकुलपति शम्भु राईले यसरी नृत्यक्षरमा आधारित रहेर नेपालमा पहिलो पटक यस्तो प्रशिक्षण दिएको उल्लेख गर्नुभयो ।
राष्ट्रिय सभा सदस्य जगप्रसाद शर्माले प्रशिक्षण सधैँ उपयोगी हुने बताउँदै त्यहाँ सिकेका कुरालाई जीवनमा लागु गर्न विद्यार्थीलाई सुझाव दिनुभयो । प्रतिष्ठानकी सदस्यसचिव प्रगति महराले नृत्यसम्बन्धी यो प्रशिक्षण विगतको भन्दा निकै फरक र थप उपयोगी भएको बताउनुभयो ।
