कर्णाली भित्रिने गाडीको स्वचालित निगरानी

सुर्खेत समाचारदाता 

सुर्खेत, चैत ९ गते । कर्णाली प्रदेश भित्रिने सबै गाडी अब प्रदेश सरकारले स्वचालित रूपमा निगरानी गर्ने भएको छ । शुक्रबार कर्णाली प्रदेश भित्रिने नाका सुर्खेतको भेरीगङ्गा नगरपालिका–५, बबईमा आन्तरिक मामिला तथा कानुन मन्त्रालयले डिजिटल प्रविधिमा आधारित स्वचालित नम्बर प्लेट पहिचान गर्ने प्रविधि (डिजिटल चेक प्वाइन्ट) जडान गरेपछि प्रदेशमा भित्रिने सबै गाडीको निगरानी हुने भएको हो । 

शुक्रबार एक कार्यक्रम गरी कर्णाली प्रदेशका मुख्यमन्त्री यामलाल कँडेलले सो प्रविधिको शुभारम्भ गर्नुभयो । उक्त नाकाबाट दैनिक एक सयभन्दा बढी सवारीसाधन आवतजावत गर्दछन् । प्रदेश सरकारको करिब १० लाख रुपियाँको लागतमा बबईमा दुई वटा अत्याधुनिक क्यामरा, डिस्प्ले जडान गरिएको छ । उक्त प्रविधिले स्वचालित रूपमा गाडीहरूको नम्बर, रङ, भित्रिएको वा बाहिरिएको समय खिच्ने छ । अब उक्त नाकाबाट कति सवारीसाधन भित्रिए वा बाहिरिए भनेर तथ्याङ्क राख्न सहज हुने छ भने प्रहरीलाई अपराध अनुसन्धानमा पनि सहयोग पुग्ने जनाइएको छ । 

प्रविधिको शुभारम्भ गर्दै मुख्यमन्त्री कँडेलले जडान गरिएको प्रविधिको दीर्घकालीन सदुपयोग गर्न सुझाव दिनुभयो । उहाँले यसबाट यातायात व्यवसायी नतर्सन आग्रह गर्दै यसले कर्णालीमा भित्रिने र बाहिरिने सवारीसाधनको तथ्याङ्क राख्न मिल्ने बताउनुभयो । नाकामा स्वचालित नम्बर प्लेट पहिचान गर्ने प्रविधि जडान गरिएपछि यसको प्रभावका आधारमा अन्यत्र पनि जडान गर्दै जाने प्रदेश सरकारको योजना रहेको मुख्यमन्त्री कँडेलले बताउनुभयो । 

कर्णाली प्रदेशका निमित्त प्रहरी प्रमुख प्रहरी वरिष्ठ उपरीक्षक (एसएसपी) शिव श्रेष्ठले नाकामा डिजिटल चेक प्वाइन्टले गाडीको नम्बर, रङ र समयको रेकर्ड राख्ने हुँदा अवाञ्छित घटनालाई न्यूनीकरण गर्न सघाउने बताउनुभयो । उहाँले यसबाट अपराध अनुसन्धानमा सहयोग पुग्नुका साथै जाँच कार्यलाई पनि छिटोछरितो बनाउने उल्लेख गर्नुभयो । प्रदेश नाकाका साथै अन्य जिल्ला भित्रिने नाकामा पनि यस्तो प्रविधि जडान गर्न सकिने भएकाले प्रहरीले गुरुयोजना बनाएर गृहकार्य थाल्ने उहाँले जानकारी दिनुभयो । यो प्रविधिले इम्बोस्ड नम्बर भएका गाडीको ९९ प्रतिशत र अन्य पुराना प्रविधिको नम्बर भएको गाडीको ८५ प्रतिशत रेकर्ड राख्न सक्ने उहाँको भनाइ छ । 

आन्तरिक मामिला तथा कानुन मन्त्रालयका सचिव पुष्पराज शाहीले कुनै अपराध गरी भागेका गाडी यस प्रविधिले रेकर्ड राख्दा प्रहरीलाई सहयोग पुग्नुका साथै शान्तिसुरक्षा कायम राख्न पनि सहज बनाउने बताउनुभयो । साथै अभिलेख राख्न र ट्राफिक प्रहरीसँग हुने अनावश्यक कुराकानीलाई पनि यस प्रविधिले घटाउने उहाँको भनाइ छ । 

उक्त प्रवधि सुर्खेतस्थित क्विक कम्प्युटर सोलुसनले १५ दिन लगाएर जडान गरेको हो । सोलुसनका सञ्चालक धर्म भण्डारीले सो क्यामराले २० मिटरसम्मको दुरी खिच्न सक्ने जानकारी दिँदै २० टेराबाइट क्षमताको भएकाले गाडीको नम्बर प्रस्टसँग रेकर्ड राख्न सक्ने बताउनुभयो । उहाँका अनुसार रेकर्ड भएका सामग्री पाँच महिनासम्म हेर्न सकिने छ । 

राष्ट्रिय यातायात व्यवसायी महासङ्घका कर्णाली प्रदेश अध्यक्ष रमेश सापकोटा र भेरीगङ्गा नगरपालिकाका कार्यवाहक प्रमुख प्रेमबहादुर सारूले डिजिटल चेक प्वाइन्ट प्रविधि जडान गरिएपछि यातायात व्यवसायी र सर्वसाधारणलाई सहज हुने अपेक्षा व्यक्त गर्नुभएको छ ।