नगरपालिका जोड्ने मुख्य सडक अलपत्र

मुसीकोट समाचारदाता  

रुकुमपश्चिम, फागुन २४ गते  । रुकुमपश्चिमको आठबिसकोट नगरपालिकाको केन्द्र जोड्ने चिसापानी–राडीज्युला सडक निर्माणको काम अलपत्र अवस्थामा छ । निर्माणको जिम्मा पाएको ठेकेदार कम्पनीले तोकिएको समयमा काम नगर्दा नगरपालिकाको महìवपूर्ण मानिएको सडक अलपत्र परेको हो । 

पूर्वाधार विकास कार्यालयमार्फत भएको ठेक्का पाएको ठेकेदार कम्पनी पिएस जिएसएचसी जेभी काठमाडौँले सडक निर्माणका लागि सम्झौता भएको लामो समयसम्म पनि काम नियमित नगर्दा सडक अलपत्र परेको हो । ठेकेदारको अटेरीले चार वर्षमा पनि आयोजनाको काम हुन नसकेको आठबिसकोट नगरपालिका प्रमुख रवि केसीले जानकारी दिनुभयो । उहाँका अनुसार सडक अलपत्र अवस्थामा हुँदा स्थानीयवासी, यात्रु तथा यातायात व्यवसायीसमेतले सास्ती पाएका छन् । 

ठेकेदार कम्पनी र पूर्वाधार कार्यालयबिच २०७८ जेठ ३ गते ३३ करोड ४८ लाख ८९ हजार ८७३ रुपियाँमा आठबिसकोट नगरपालिका–११, चिसापानीदेखि पालिकाको केन्द्र राडीबजारसम्मको आठ किलोमिटर सडक निर्माणसहित चिसापानी, राडी, नदुवा, मुसीकोट, माछिमी सडक कालोपत्रेका लागि सम्झौता भएको थियो । निर्माण कम्पनीलाई नगरपालिकाका तर्फबाट समेत समयमै सडक निर्माणका लागि पटक पटक लिखित तथा मौखिक रूपमा अनुरोध गर्दा पनि अटेरी गरिरहेकोले पूर्वाधार विकास कार्यालयमा ध्यानाकर्षणपत्रसमेत पेस गरिएको नगरप्रमुख केसीले जानकारी दिनुभयो । उहाँका अनुसार निर्माण व्यवसायीबाट काम गर्नुको साटो विभिन्न बहानामा म्याद थप गर्ने काम मात्र भएको छ । जसका कारण यो सडकखण्ड हुँदै आवातजावत गर्न दिनहुँ समस्या बढ्दै गएको छ । 

निर्माणको जिम्मा पाएको ठेकेदारलाई तोकिएको समयमै काम सम्पन्न हुने अवस्था सिर्जनाका लागि पूर्वाधार कार्यालयमा ध्यानाकर्षणपत्र पेस गरिएको नगरप्रमुख केसीले बताउनुभयो । ध्यानाकर्षणपत्रको बेवास्ता भएमा ठेकेदार कम्पनी र सम्बन्धित कार्यालयविरुद्ध नगरपालिकाले सङ्घर्ष गर्ने चेतावनीसमेत दिएको छ । 

पूर्वाधार विकास कार्यालयका अनुसार अहिलेसम्म ४० प्रतिशत मात्र भौतिक प्रगति भएको छ । कार्यालयका तर्फबाट तोकिएको समयमै काम सम्पन्न गर्न निर्देशनसमेत गरिएको छ । कार्यालय प्रमुख रामचन्द्र बिसीले २०८२ जेठ २० गते भित्र काम सम्पन्न गरिसक्नुपर्ने सम्झौता रहेको जानकारी दिनुभयो । तोकिएको समयमा काम हुने सम्भावना भने न्यून रहेको बताइन्छ । सडक निर्माणको काम अलपत्र हुँदा आठबिसकोटबाट जिल्ला सदरमुकाम मुसीकोट, काठमाडौँ, नेपालगन्ज, दाङ, सुर्खेत जाने यात्रुहरूले सास्ती पाउने गरेका छन् । बर्सौंसम्म बाटोको अवस्थामा सुधार नहुँदा स्थानीयले समेत दुःख पाउँदै आएको गुनासो गरेका छन् ।