काठमाडौं, जेठ १५ गते । पोखराबाट मुस्ताङको जोमसोम विमानस्थलका लागि उडेको तारा एयरको (९एन एइटी) कल साइनको ट्विनअटर विमान मुस्ताङको लेते भन्ने स्थानमा ठोक्किएको आशङ्का गरिएको छ । यसको औपचारिक पुष्टि भने हुनसकेको छैन । स्थानीय नरसिंह शेरचनले लेते र घासा क्षेत्रको बीचबाट आवाज आएको जानकारी दिनुभयो ।
हाम्रा गण्डकी प्रदेश संयोजक रमेश पौडेलका अनुसार, खोजी कार्यका लागि जोमसोम विमानस्थलबाट लेते र घासा क्षेत्रतर्फ गएको फिस्टेल एयरको हेलिकोप्टर बीचबाटै फर्केको छ । मौसम खराब भएकाले खोजी गर्न नसकेपछि पुनः जोमसोम विमानस्थलमै फर्केको प्रदेश कार्यालय पोखराका प्रहरी सहायक निरीक्षक जीबलाल सुवेदीले जानकारी दिनुभयो ।
यसैबीच, खोजी गर्न काठमाडौंबाट नेपाली सेनाको हेलिकोप्टर पोखरामा अवतरण गरेर त्यहाँबाट सेनाका प्रमुख बाबुराम श्रेष्ठको नेतृत्वको टोली लेतेतर्फ प्रस्थान गरेको छ । मुस्ताङका अधिकांश स्थानमा छिटो छिटो मौसम परिवर्तन हुने गर्दछ ।
आइतबार विहान ९:५५ बजे उडेको जहाज सम्पर्कविहीन भएको विमान मुस्ताङको लेतेमा ठोक्किएको हुनसक्ने जानकारी प्राप्त भएको छ । पोखरा विमानस्थलका अनुसार घोरेपानी भन्ने ठाउँसम्म पुग्दा सम्पर्क कायमै थियो । त्यसपछि सम्पर्कविहीन बनेको थियो ।
यात्रु १९ र चालक दलका सदस्य तीनसहित जम्मा २२ जना सो जहाजमा रहेको जानकारी प्राप्त भएको छ । जसमा छ विदेशी, १३ जना नेपाली र तीन जना चालकदलका सदस्यसहित २२ जना लिएर उडेको थियो । पोखरा विमानस्थलबाट तारा एयर र समिट एयरका जहाज सँगसँगै उडेका थिए ।
तारा एयरको जहाज जोमसोम विमानस्थल नै नपुगी फर्केको स्थानीयबासीको भनाइ छ । विमानमा खराब भएर वा मौसमका कारण जहाज अवतरण हुन नसकेको भन्ने बारे केही पनि खुल्न सकेको छैन ।
आहिलेसम्म सम्पर्कविहीन जहाजको खोजीकार्य सुरु गरिएको तारा एयरका प्रवक्ता सुदर्शन बर्तौलाले जानकारी दिनुभयो । आइतबार विहानैदेखि मौसम बदली हुँदा देशैभर वर्षा भएको थियो ।
Gorkhapatra...
