मिलनको नयाँ चलचित्र आउँदै

काठमाडौँ, माघ १५ गते । निर्देशक मिलन चाम्सले आफ्नो आगामी चलचित्र प्रेमकथामा आधारित हुने बताउनुभएको छ । सोमबार आफ्नो निर्देशनमा तयार हुने १० औँ चलचित्रको घोषणा गर्दै निर्देशक चाम्सले चलचित्र आगामी अगस्टमा छायाङ्कन हुने जानकारी दिनुभयो । उहाँले भन्नुभयो, “हामी स्क्रिप्टको काममा व्यस्त छौँ । यसमा युवापुस्ताको प्रेमलाई दर्शकले देख्न पाउनु हुने छ ।” 

चलचित्र ‘लिली बिली’ पश्चात् उहाँले पूर्ण प्रेम कथानक फिल्म निर्देशन गर्न लाग्नुभएको हो । उहाँले यसबारे विस्तृत जानकारी आउँदो साता दिने बताउनुभयो । गोर्खा फिल्म्स र चाम्स इन्टरटेनमेन्टको संयुक्त ब्यानरमा निर्माण हुने चलचित्रलाई राजीव थापाले लेख्नुभएको छ । चलचित्र नेपाल र लन्डनमा छायाङ्कन हुने छ ।