गोरखापत्र समाचारदाता
काठमाडौँ, माघ ८ गते । सार्वजनिक भएको दुई दिनमा नेपाली चलचित्र ‘एक्टर : टेक वन’ को ट्रेलर नेपालका लागि युट्युब ट्रेन्डिङको शीर्ष स्थानमा पुगेको छ । अहिलेसम्म ट्रेलर १५ लाख भ्युजसहित ट्रेन्डिङमा रहेको छ ।
रोमाञ्चक शैलीमा तयार पारिएको ट्रेलरले उल्लेख्य प्रशंसा प्राप्त गरेको छ । सार्वजनिक भएको छोटो समयमै ट्रेलरलाई लाखौँ दर्शकले युट्युबसहित अन्य विभिन्न इन्टरनेट प्लेटफर्ममा हेरिरहेका छन् ।
राजन भुसालद्वारा निर्देशित यस चलचित्रको ट्रेलरले प्रदीप खड्काको चरित्रलाई केन्द्रमा राख्दै त्रिकोणात्मक प्रेमकथा र कठिन सङ्घर्षको कथा प्रस्तुत गरेको छ । आना शर्मा, दिव्या रायमाझी, राजवल्लभ कोइराला जस्ता कलाकारको अभिनयले चलचित्रलाई थप आकर्षक बनाएको छ । चलचित्रमा दिव्य देव, सृजना अधिकारी, उषा रजक, सुशील सिटौलालगायतका कलाकारको प्रमुख भूमिका छ ।
