सरकारले जनअपेक्षा अनुसार काम गरिरहेको छ : मन्त्री अधिकारी

गोविन्द शर्मा

बाँके, मङ्सिर ७ गते । भूमि व्यवस्था, सहकारी तथा गरिबी निवारण मन्त्री बलराम अधिकारीले सरकारले जनतामा आशा जगाउने काम गरिरहेको बताउनुभएको छ । नेकपा एमाले बाँके जिल्ला कमिटीको आयोजनामा शुक्रबार नेपालगञ्जमा आयोजित अगुवा कार्यकर्ता भेलालाई सम्बोधन गर्दै मन्त्री अधिकारीले वर्तमान सरकारसँग आम जनताको तहबाट देखिएको आशालाई पूरा गरेर छोड्ने प्रतिबद्धता व्यक्त गर्नुभएको हो ।

मन्त्री अधिकारीले भन्नुभयो, "सरकारले जनतामा आशा जगाउने काम गरिरहेको छ, सरकारले जनताका आशा र अपेक्षालाई केन्द्रमा राखेर काम गरिरहेको छ ।" प्रधानमन्त्री केपी शर्मा ओलीको निर्देशन अनुसार मन्त्रालयहरु जनताको आशा र अपेक्षा पूरा गर्न लागिपरेको उहाँले बताउनुभयो । 

मन्त्री अधिकारी सहकारीको क्षेत्रमा देखिएको समस्या समाधानका लागि सरकार गम्भीर रहेको बताउँदै समस्याग्रस्त सहकारीको वर्गिकरणको काम भइरहेको बताउनुभयो । उहाँले सङ्घ र प्रदेश अन्तर्गत रहेका सहकारीको पहिचान गरी उनीहरुको अवस्था बुझ्न बलियो नियमावली निर्माण गर्न आवश्यक देखिएको बताउनुभयो । केही समस्याग्रस्त सहकारीका कारण राम्रो काम गरेका सहकारीहरु पनि बदनाम भइरहेकाले सहकारीको स्पष्ट वर्गीकरण आवश्यक देखिएको मन्त्री अधिकारीको भनाइ छ ।