हरि काेइराला
उर्लाबारी, मङ्सिर २ गते । पूर्वपश्चिम राजमार्ग अन्तरगत मोरङको पथरीशनिश्चरे १ बजारमा यात्रुवाहक बसले मोटरसाइकललाई ठक्कर दिँदा मोटरसाइकल चालकको मृत्यु भएको छ ।
बिहान ११ बजेतिर पश्चिमबाट पूर्वतर्फ आउँदै गरेको प्रदेश १-०१-००१ ख ४१६३ नम्बरको बसले पूर्वबाट पश्चिम जाँदै गरेको प्रदेश १-०२-०५५ प ७३८ नम्बरको मोटरसाइकललाई ठक्कर दिँदा मोटरसाइकल चालक मोरङको सुन्दरहरैँचा ६ का २४ वर्षीय रमेश खड्काको मृत्यु भएको हो । बसको ठक्करबाट गम्भीर घाइते भएका खड्कालाई तत्काल उपचारका लागि विराटनगरस्थित न्युरो अस्पताल लगिएको थियो ।
अस्पताल पुर्याए लगत्तै खड्का मध्याह्न १२:२०मा मृत्यु भएको इलाका प्रहरी कार्यालय पथरीका प्रहरी निरीक्षक खगेन्द्र एक्तेनले बताउनुभयो । खड्कासँगै मोटरसाइकलमा सवार चौदण्डीगढी नगरपालिका २ कि २४ वर्षीय कृष्णकुमारी खड्काको न्युरो अस्पतालमा उपचार भइरहेको प्रहरीले जनाएको छ ।
प्रहरी निरीक्षक खगेन्द्र एक्तेनले दुर्घटना गराउने बस र चालकलाई नियन्त्रणमा लिई अनुसन्धान सुरु गरिएको बताउनुभयो ।
