कपिल ज्ञवाली
सिद्धार्थनगर, कात्तिक २९ गते । दुई किलोमिटर दूरीमा सञ्चालनमा रहेको बुटवलस्थित सिद्धार्थ केबलकार लिमिटेडको केबलकार दसैंयता ७० हजारभन्दा बढीले चढेका छन् । लिमिटेडले आइपिओ खोल्ने तयारी पनि गरेको छ ।
दसैंदेखि अनौपचारिक सञ्चालनमा आएको केबलकारले छिट्टै विशेष साधारण सभा गर्ने र सोपछि आइपिओ खोलिने बुटवलमा पत्रकार सम्मेलन गरी जानकारी गराइएको छ ।
हाल सिद्धार्थ केवलकार लिमिटेडको चुक्ता पुँजी ६० करोड रुपियाँ छ । त्यसलाई वृद्धि गरी एकसय करोड पुर्याइने कम्पनीका प्रबन्ध सञ्चालक प्रभुलाल अधिकारी गणेशले जानकारी दिनुभयो । अहिलेसम्म यो केबलकारमा १ अर्ब १० करोड रुपियाँ लगानी भइसकेको छ ।
‘सर्वसाधारणका लागि १५ करोड रुपियाँको पब्लिक शेयर खोल्ने कुरा थियो । तर अब त्यो पनि बढाउने कि भन्ने भएको छ’ प्रबन्ध सञ्चालक अधिकारीले भन्नुभयो । बुटवल उपमहानगरपालिकाबाट पाल्पाको तिनाउ गाउँपालिकाको नुवाकोटलाई जोड्ने यो केबलकारको बटम स्टेशन र टप स्टेशनमा पूर्वाधार निर्माण भइरहेको छ । नयाँवर्ष २०८२ वैशाखदेखि यो पूर्णरुपमा सञ्चालनमा आउनेछ ।
निर्माणकै क्रममा रहेको यो केवलकार गएको दसैंबाट अनौपचारिक सञ्चालन गरिएको छ । जसमा हालसम्म ७० हजारभन्दा बढी पर्यटकले केबलकारको यात्रा गरी नुवाकोट अवलोकन गरेका छन् । केवलकार निर्माणसँगै नुवाकोटलाई थप पर्यटकीय आकर्षक बनाउने र बटम स्टेशनमा पनि आकर्षक बनाएर सकिएपछि आगामी २०८२ वैशाख १ गते उद्घाटन गर्नेगरी काम भइरहेको प्रबन्ध सञ्चालक अधिकारीले जानकारी दिनुभयो ।
नुवाकोटको ऐतिहासिकतालाई उजागर गर्दै उत्कृष्ट पर्यटकीय गन्तव्यका रुपमा चिनाउनेगरी काम गरिएको कम्पनी सञ्चालक समितिका अध्यक्ष इञ्जिनियर राजेन्द्रसिंह गुरुङले बताउनुभयो । ‘केबलकार एउटा पाटो मात्र हो’ ‘नुवाकोटको आफ्नै विशेषता र इतिहास छ, उत्कृष्ट पर्यटकीय गन्तव्य बन्नेमा दुईमत छैन’ उहाँको भनाइ छ ।
दसैँयता ७० हजारले चढे केवलकार
निर्माणकै क्रममा रहेको यो केबलकार गएको दसैंबाट अनौपचारिक सञ्चालन गरिएको छ । जसमा हालसम्म ७० हजारभन्दा बढी पर्यटकले केबलकारको यात्रा गरी नुवाकोट अवलोकन गरेका छन् ।
केवलकार निर्माणसँगै नुवाकोटलाई थप पर्यटकीय अकर्षक बनाउने र बटम स्टेशनमा पनि आकर्षक बनाएर सकिएपछि आगामी २०८२ वैशाख १ गते उद्घाटन गर्नेगरी काम भइरहेको प्रबन्ध सञ्चालक अधिकारीले जानकारी दिनुभयो ।
हाल कम्पनीले प्रतियात्रु ३२५ रुपियाँ शुल्क निर्धारण गरेको छ । यसलाई थोरै परिमार्जन गरेर ३५० रुपियाँ बनाउन लागिएको पनि कम्पनीले जनाएको छ । यो केवलकारमा ५ वटा संस्थागतसहित २२७ जना प्रमोटर शेयर सदस्य छन् ।
यो केबलकारको दूरी २ किलोमिटर छ । जसमा २५ वटा गोण्डुला छन् । एउटा गोण्डुलामा ८ जना यात्रु क्षमता छ । बटम स्टेशनबाट टप स्टेशनमा पुग्न ९ मिनेटको समय लाग्ने कम्पनीले जनाएको छ । अहिले ४८ जनाले प्रत्यक्ष रोजगारी पाएका छन् ।
