शारदाकुमारी मानन्धर
वर्षा बाढी र पहिरो पछिको रमाइलो चाड
सारा नेपालीको अत्यन्त मन पर्ने चाड ।
पशुपंक्षी, जनावर र व्यक्तिपूजा गरिने चाड,
बालक, युवा–युवती, बृद्धबृद्धा रमाउने चाड ।।
जताततै झिलिमिली बत्तीहरुले सजाइने
धनकी देवी लक्ष्मीको पूजा आराधना गरिने ।
दाजुभाइ र दिदीबहिनीविच माया गाँसिने,
चाड यो सयपत्री र मखमलीले शृङ्गारिने ।।
काग, कुकुर, गाई, गोरु, गोबर्धन पर्वतमा
पूजा गरिन्छ हाम्रो परम्परा र संस्कृतिमा ।
महपूजा पनि गरिन्छ नेवार समुदायमा,
नेपाल सम्बत्को न्हुँ–दं सुरु भएको दिनमा ।।
सबै मिली भैली–द्यौसी खेलिन्छ ठाउँ–ठाउँमा,
दानी दानवराज बली राजाको स्वागतमा ।
सेलरोटी पकाउने गरिन्छ प्रायः घर–घरमा,
अति स्वादिलो परिकार यो सम्पूर्ण नेपालीमा ।।
