बिष्णुप्रसाद पोखरेल
दमक, असोज २६ गते । भौतिक पूर्वाधार तथा यातायातमन्त्री देबेन्द्र दाहालले असोजको दोस्रो साता आएको बाढीपहिरोले भत्काएको बिपी राजमार्गलाई चाँडो पुनः निर्माण गरेर सञ्चालनमा ल्याइने बताउनुभएको छ ।
बाढीपहिरोले बिपी राजमार्गको १२ किलोमिटरभन्दा धेरै भाग बगाएको छ । गृह जिल्ला झापामा रहनुभएका भौतिक पूर्वाधार तथा यातायात मन्त्री दाहालले काठमाडौँलाई पूर्वी नेपालसँग जोड्ने छोटो राजमार्गका रुपमा रहेको बिपी राजमार्ग भएर काठमाडौँ फिर्न सक्ने अवस्था सिर्जना हुने बताउनुभयो ।
धेरै भत्किएका र बगाएका सडकहरु सञ्चालनमा आइसकेको भन्दै उहाँले दसैँको समयमा पनि सडक पुनः निर्माणको काम नरोकिने उल्लेख गर्नुभयो । दसैँ मनाउन पूर्वी नेपाल आउनु भएका यहाँहरु बीपी राजमार्ग भएर फिर्न सक्ने अवस्था सिर्जना गर्न हामी लागि परेका छौ, दाहालले भन्नुभयो ।
आंशिक रुपमा सडक सुचारु भइसकेको जानकारी दिदै पूर्णरुपमा सञ्चालनमा ल्याउनका लागि अहिले सबै शक्ति प्रयोग भइरहेको उहाँले जानकारी दिनुभयो । यसैबिच दसैंमा गृह नगर दमक आउनुभएका मन्त्री दाहालले झापासहित पूर्वी नेपालका बिभिन्न पुल तथा सडक योजनाहरुको अनुगमन गर्नुभयो ।
कमल गाउँपालिका अन्तर्गत मंगलबारे–शिवगंज सडकमा पर्ने गेउरिया खोलाको पूल निर्माणको स्थलगत अवलोकन गर्नु भएको दाहालका स्वकीयसचिव गोपाल झापालीले जानकारी दिनुभयो ।
