राममणि दाहाल
हेटौँडा, भदौ २० गते। उत्तरी मकवानपुरको थाहा नगरपालिका ४ दामनस्थित त्रिभुवन राजपथ सडक खण्डमा गुडिरहेको अवस्थामा नेपाली सेनाको गाडीमा आगजनी भएको छ।
मकवानपुरको पालुङबाट सिमभञ्ज्याङतर्फ आउँदै गरेको बा १ ग ३४३६ नम्बरको नेपाली सेनाको वानटन गाडी बिहीबार दिउँसो गुडिरहेको अवस्थामा अचानक आगलागी भएको जिल्ला प्रहरी कार्यालय मकवानपुरका प्रहरी नायव उपरीक्षक लक्ष्मी भण्डारीले जानकारी दिनुभयो।
थाहा नगरपालिका-६ स्थित युद्ध भैरव गण तालिम शिविर चनवन ब्यारेकका सेना सवार रहेको वानटन गाडी गुडिरहेको अवस्थामा अचानक आगलागी भएपछि उक्त आगो प्रहरी टोली, नगर प्रहरी र दमकलको सहयोगमा पूर्ण रुपमा नियन्त्रणमा आएको छ। आगलागी के कसरी भएको भन्ने बारेमा बुझ्ने कार्य भइरहेको र गाडीमा भएको आगलागीबाट मानवीय क्षति नभएको प्रहरीले जनाएको छ।
