बिशाल सुनार
दुल्लु, बैशाख ३० गते । दुल्लु नगरपालिका –६ घडास्थित भित्री सडकमा ट्रयाक्टर दुर्घटना हुँदा एक जनाको ज्यान गएको छ । ६ जना घाइते भएका छन् ।
बिधुतको पोल बोकी बस्नेपाटीदेखि खड्केगैरा जाँदै गरेको भे.१ त ८९६ नम्वरको ट्रयाक्टरमा लोड गरिएको पोल हल्लिए पछि दुर्घटना भएको प्रत्यक्षदर्शी टेकबहादुर खड्काले जानकारी दिनुभयो ।
मृत्यु हुनेमा दुल्लु नगरपालिका –६ खच्चे गैराका ५५ बर्षीय मानबहादुर रावलको घटनास्थलमै मृत्यु भएको छ । दुर्घटनामा परि घाइते हुनेहरु एकै गाउँका रहेका छन् । घाइते हुनेमा दुल्लु नगरपालिका –६ स्थित बर्ष ५६ का कमारो रावल, बर्ष ४८ का दानबहादुर रावल र बर्ष ३१ का सवारीधनी ललित खड्कालाई थप उपचारका लागि कर्णाली प्रदेश अस्पताल सुर्खेत रिफर गरिएको छ ।
साथै अन्य तीन जना सोही गाउँका बर्ष ६० का छविलाल रावल, बर्ष ३४ का ललित खड्का र सवारी चालक बर्ष २५ का कलम शाहीको दुल्लु अस्पतालमा उपचार भइरहेको जिल्ला प्रहरी कार्यालय दैलेखका प्रमुख सुनिल दाहालले जानकारी दिनुभयो ।
