काठमाडौँ, वैशाख १५ गते । प्रतिनिधि सभाको कृषि सहकारी तथा प्राकृतिक स्रोत समिति सभापति डा. आरजु राणा देउवाले सरकारले कुपोषण घटाउन आगामी बजेटमा पोषणको बजेट बढाउनुपर्ने बताउनुभएको छ । ग्रामीण विकास तथा सशक्तीकरण केन्द्र (रुडुक) र वर्ल्ड भिजनले शुक्रबार आयोजना गरेको ‘पोषणसम्बन्धी राष्ट्रिय कार्यशाला’ लाई सम्बोधन गर्दै उहाँले कुपोषण अन्त्यका लागि राज्यले बजेटमा उच्च प्राथमिकता दिनुपर्नेमा जोड दिनुभयो ।
कुपोषण अन्त्यका लागि रणनीतिभन्दा पनि बजेट बढाउनुपर्ने भन्दै उहाँले बालबालिकाको विकास पनि पोषणमा निर्भर हुने भएकाले राज्यको ध्यान पोषणमा जानुपर्ने बताउनुभयो । विद्यालयमा पोषणको पैसा घटाउने सरकारी नीतिका कारण भविष्यमा गम्भीर असर पुग्ने भन्दै उहाँले पोषणका लागि विद्यार्थीले पाउने दैनिक १५ रुपियाँ अत्यन्त कम भएको उल्लेख गर्नुभयो । उहाँले आफूले संसदीय समितिबाट कृषि क्षेत्रमा बजेट बढाउन प्रयत्न गरिरहेको बताउनुभयो ।
कार्यक्रममा सङ्घीय मामिला तथा सामान्य प्रशासन मन्त्रालयका सहसचिव रेशमराज कँडेलले पोषणका विषयमा सरकारले कार्यविधि बनाएर लागु गर्न चाहेको जानकारी दिनुभयो । वर्ल्ड भिजनका नेपाल निर्देशक रोजलिङ गेब्रियलले नेपालमा स्तनपात गराउनेको सङ्ख्या घट्दै गएको बताउनुभयो । उहाँले भन्नुभयो, “यो विषय चिन्ताको विषय हो । कुपोषण अन्त्यका लागि सबैको सहकार्य हुनु जरुरी छ ।”
ग्रामीण विकास तथा सशक्तीकरण केन्द्र (रुडुक) का निर्देशक डा. कृष्ण श्रेष्ठले कुपोषण अन्त्यका लागि सबैको सहकार्य आवश्यक रहेको बताउनुभयो । वर्ल्ड भिजनका कार्यक्रम निर्देशक श्याम अधिकारीले कुपोषण हटाउन आफूहरूले विभिन्न अभियान सञ्चालन गरेको बताउनुभयो ।
